ខេត្តព្រះសីហនុ៖ គ្រោះថ្នាក់ចរាចរណ៍មួយ បានកើតឡើងរវាងរថយន្តស៊េរីទំនើបមួយគ្រឿង បានបុកគ្នា ពេញមួយទំហឹង ជាមួយនឹងរថយន្តមួយគ្រឿងទៀត បណ្ដាលឲ្យរងការខូចខាតយ៉ាងដំណំ ទាំងសងខាងកាលពីវេលាម៉ោង ១២និង២០នាទីរំលងអាធ្រាត្រ ឈានចូលថ្ងៃទី២ ខែកញ្ញា ឆ្នាំ២០២១ នៅតាមបណ្ដោយផ្លូវ២ធ្នូ ក្បែរនឹងសណ្ឋាគារស៊ីហ៊ូ ស្ថិតក្នុងសង្កាត់លេខ ០៣ ក្រុងព្រះសីហនុ ខេត្តព្រះសីហនុ។

ប្រភពពីសមត្ថកិច្ចបានប្រាប់មកកាន់ TVFB ឲ្យបានដឹងថា មុនពេលកើតហេតុ រថយន្តស៊េរីទំនើបឡង់គ្រឺស័រ ពាក់ស្លាកលេខ ភ្នំពេញ 2BQ-9666 បើកបរដោយជនជាតិចិន ក្នុងទិសដៅពីកើតមកលិច ខណៈពេលដែលមកដល់កន្លែងកើតហេតុខាងលើ ស្រាប់តែមានរថយន្តមួយគ្រឿងទៀតម៉ាក Toyota Prius ពាក់ស្លាកលេខ ភ្នំពេញ 2BH-1308 បើកបរដោយជនជាតិចិនដូចគ្នា ក្នុងទិសដៅពីលិចមកកើត បានបត់ចូលទៅផ្លូវលេខ ៦០២ បានពាក់កណ្ដាលរថយន្តទៅហើយ ក៏ត្រូវរថយន្តម៉ាកឡង់គ្រឺស័រ មកដល់ដូចគ្នាជាន់ហ្វ្រាំងមិនជាប់ បានបុករថយន្តToyota Prius ចំថ្ពាល់ខាងស្ដាំមួយទំហឹង បណ្ដាលឲ្យប្លោងទៅបុកជាមួយនឹងបង្គោលផ្លាកសញ្ញាចរាចរណ៍ រួចក៏ជ្រុលទៅទៅក្នុងព្រៃម្ខាងផ្លូវ រងការខូចខាតផ្នែកខាងមុខយ៉ាងដំណំ ចំណែកអ្នកបើកបររងរបួសស្រាល ហើយភាគីខាងរថយន្តម៉ាកឡង់គ្រឺស័រ ក៏រងការខូចខាតផ្នែកខាងមុខខ្លាំងដូចគ្នា។

ក្រោយពេលកើតហេតុ សមត្ថកិច្ចនគរបាលចរាចរណ៍ផ្លូវគោក បានចុះមកធ្វើការវាស់វែង យករថយន្តទាំងសងខាង ទៅរក្សាទុកនៅការិយាល័យចរាចរណ៍ រង់ចាំភាគីទាំងសងខាង ចូលខ្លួនមកដោះស្រាយគ្នាតាមច្បាប់បន្តទៀត ៕