រាជធានីភ្នំពេញ ៖ ករណីគ្រោះថ្នាក់ចរាចរណ៍មួយបានកើតឡើង រវាងម៉ូតូធំ Kawasaki និងរថយន្ត CRV មួយគ្រឿងទៀត បណ្ដាលឲ្យមានអ្នករងរបួសធ្ងន់ កាលពីវេលាម៉ោង ១០យប់ ថ្ងៃទី១ ខែកញ្ញា ឆ្នាំ២០២១ នៅចំណុចផ្លូវម៉ុងរឹទ្ធី ក្នុងសង្កាត់ទួលសង្កែ២ ខណ្ឌឫស្សីកែវ រាជធានីភ្នំពេញ។

ប្រភពព័ត៌មាននៅកន្លែងកើតហេតុ បានឲ្យដឹងថា មុនពេលកើតហេតុ គេបានឃើញបុរសម្នាក់ ជិះម៉ូតូធំ Kawasaki ពាក់ស្លាកលេខ ភ្នំពេញ 1GT-2207 ធ្វើដំណើរតាមបណ្ដោយផ្លូវម៉ុងរឹទ្ធី ក្នុងទិសដៅពីកើតមកលិច មកដល់ចំណុចកើតហេតុ ក៏បានបុកគ្នាជាមួយនឹងរថយន្តមួយគ្រឿង ដែលពាក់ស្លាកលេខ ភ្នំពេញ 2O-4855 ដែលបត់ត្រឡប់ក្រោយ ក្នុងទិសដៅបញ្ច្រាសគ្នា បុកគ្នាពេញមួយទំហឹង បណ្ដាលឲ្យម្ចាស់ម៉ូតូធំរងរបួសធ្ងន់ បាក់ជើង ត្រូវបានក្រុមគ្រូពេទ្យធ្វើការសង្គ្រោះបន្ទាន់ នៅមន្ទីរពេទ្យ។

ក្រោយកើតហេតុ សមត្ថកិច្ចជំនាញចរាចរណ៍របស់អធិកានគបាលខណ្ឌឫស្សីកែវ សហការជាមួយនគរបាលចរាចរណ៍ក្រុង បានចុះមកធ្វើការវាស់វែង យករថយន្តនិងម៉ូតូទៅរក្សាទុក នៅការិយាល័យចរាចរណ៍ផ្លូវគោក នៃស្នងការដ្ឋាននគរបាលរាជធានីភ្នំពេញ រង់ចាំដោះស្រាយគ្នាតាមច្បាប់បន្តទៀត៕