រាជធានីភ្នំពេញ ៖ ជនសង្ស័យម្នាក់ ត្រូវបានកម្លាំងសន្តិសុខ នៅក្នុងការដ្ឋានផ្លូវ R6 ឃាត់ខ្លួនពាក់ព័ន្ធនឹងករណីយកដែកចេញពីក្នុងកន្លែងការដ្ឋាន សាងសង់មួយកន្លែង បង្កកាភ្ញាក់ផ្អើលនៅវេលា១១និង៣០នាទី ថ្ងៃទី២ ខែកញ្ញា ឆ្នាំ២០២១ នៅតាមបណ្តោយផ្លូវR6 ក្នុងសង្កាត់ស្រះចក ខណ្ឌដូនពេញ រាជធានីភ្នំពេញ ។

ប្រភពព័ត៌មានបានឲ្យដឹងថា មុនពេលកើតហេតុ កម្លាំងសន្តិសុខយ៉ាមការនៅផ្លូវR6 ទទួលដំណឹងពីថ្នាក់លើរបស់គាត់ ដែលបញ្ជាក់ថា មានជនសង្ស័យលួចដែកចេញពីក្នុងការដ្ឋានសាងសង់របស់គាត់ បន្ទាប់ពីទទួលបានដំណឹងនេះរួច ក្រុមសន្តិសុខ ក៏បានតាមស្វែងរកដល់ចំណុចខាងលើ ក្បែរគុម្ពព្រៃមួយកន្លែង ក៏ប្រទះឃើញជនសង្ស័យកំពុងរៀបចំដាក់ដែកក្នុងបាវ ទើបស្ទុះទៅក្របួចបានភ្លាមៗតែម្ដង។

ក្រុមសន្តិសុខ បានបញ្ជាក់ថា ជនសង្ស័យខាងលើមិនមែនទើបតែសកម្មភាពលួយម្តងនេះ ទេ គឺលួចលើសពី២ដងទៅហើយ ដោយមានបក្ខពួកផ្សេងទៀតជិះម៉ូតូកង់បីឥណ្ឌាចាំដឹកយកទៅបន្ត ។

បន្ទាប់ពីកើតហេតុ សមត្ថកិច្ចបានចុះមកដល់ទីតាំងកើតហេតុ ដោយបាននាំខ្លួនជនសង្ស័យខាងលើ ទៅកាន់ អធិការដ្ឋាននគរបាលខណ្ឌដូនពេញ ដើម្បីចាត់ការបន្តតាមនិតិវិធីច្បាប់៕