ខេត្តកំពង់ឆ្នាំង ៖ យោងតាមផេក ស្នងការដ្ឋាននគរបាលខេត្តកំពង់ឆ្នាំង បានឲ្យដឹងថា សមត្ថកិច្ចឃាត់ខ្លួនបុរស២នាក់ដែលជាអ្នកបើករថយន្តដឹកកម្មករ ក្រោយផ្ទុះហិង្សារដាក់គ្នា នៅផ្លូវជាតិលេខ៥ បណ្តាលឲ្យមានការកកស្ទះចរាចរណ៍ កាលពីវេលាម៉ោង៦ និង១០នាទីព្រឹក ថ្ងៃទី២ ខែកញ្ញា ឆ្នាំ២០២១ លើកំណាត់ផ្លូវជាតិលេខ៥ ចន្លោះបង្គោលគីឡូម៉ែត្រលេខ៤៨-៤៩ ស្ថិតក្នុងភូមិតាកុល ឃុំពានី ស្រុកកំពង់ត្រឡាច ខេត្តកំពង់ឆ្នាំង ។

សមត្ថកិច្ចបានឲ្យដឹងថា អ្នកបើកបររថយន្តទាំង២នាក់ រួមមាន ៖ ១. ឈ្មោះ យុំ វណ្ណះ ភេទប្រុស អាយុ២៧ឆ្នាំ រស់នៅភូមិដូនម៉ៅ ឃុំខ្លុងពពក ស្រុកទឹកផុស ខេត្តកំពង់ឆ្នាំង ២. ឈ្មោះ ជុំ វី ភេទប្រុស អាយុ៣៩ឆ្នាំ រស់នៅភូមិឈូកក្រញ៉ាស់ ឃុំឃូកស ស្រុកកំពង់ត្រឡាច ខេត្តកំពង់ឆ្នាំង បណ្ដាលឲ្យខូចខាតកញ្ចក់មើលក្រោយរថយន្តចំនួនបី និង វ៉ៃតប់គ្នា និងបណ្ដាលឲ្យកកស្ទះចរាចរណ៍។

ក្រោយពីបានទទួលបណ្ដឹងពីប្រជាពលរដ្ឋតាមរយៈ ទូរស័ព្ទ កម្លាំងនគរបាលប៉ុស្តិ៍ពានី និងកម្លាំងជំនាញអធិការនគរបាលស្រុកកំពង់ត្រឡាច បានចុះដល់កន្លែងកើតហេតុ បានឃាត់ខ្លួនជនបង្ក២នាក់ និងរថយន្ត២គ្រឿង បញ្ជូនមកអធិការនគរបាលស្រុកកំពង់ត្រឡាច។

បច្ចុប្បន្នជនបង្កទាំង២នាក់ រួមទាំងរថយន្ត២គ្រឿង កម្លាំងជំនាញ អធិការនគរបាលស្រុក កសាងសំណុំរឿងបញ្ជូនមក ការិយាល័យព្រហ្មទណ្ឌកម្រិតស្រាល នៃស្នងការដ្ឋាននគរបាលខេត្តដើម្បីបន្តនីតិវិធីច្បាប់ ៕