រាជធានីភ្នំពេញ ៖ បុរសម្នាក់បានប៉ើងខ្ទាតចូលគុម្ពស្មៅចិញ្ចើមផ្លូវស្លាប់យ៉ាងរន្ធត់ ខណៈជួបគ្រោះថ្នាក់ចរាចរណ៍ រវាងរថយន្ត Toyota Tundra បានបុកជាមួយនឹងម៉ូតូស៊ុយសាគីលែត ពេញទំហឹង កាលពីវេលាម៉ោង ៨ និង២០នាទី យប់ថ្ងៃទី៥ ខែកញ្ញា ឆ្នាំ២០២១ នៅក្នុងសង្កាត់ស្វាយប៉ាក ខណ្ឌឫស្សីកែវ រាជធានីភ្នំពេញ។

ប្រភពព័ត៌មានពីបងប្អូនប្រជាពលរដ្ឋ នៅកន្លែងកើតហេតុ បានអោយដឹងថា មុនពេលកើតហេតុ គេបានឃើញបុរសម្នាក់បើករថយន្ដ Toyota Tundra មួយគ្រឿង ដែលពាក់ស្លាកលេខ ភ្នំពេញ 2BF-6261 ក្នុងល្បឿនលឿន តាមបណ្ដោយផ្លូវបេតុងមួយកន្លែង ជិតនឹងក្រសួងដែនដី មកដល់ចំណុចកើតហេតុ ក៏បានបុរសម្នាក់ កំពុងជិះម៉ូតូស៊ុយសាគីលែត ដែលពាក់ស្លាកលេខ ភ្នំពេញ 1GH-1216 ក្នុងទិសដៅបញ្ច្រាស់ទិសគ្នា ពេញទំហឹង បណ្ដាលឲ្យបុរសអ្នកជិះម៉ូតូ ហោះដូចសំឡី ចូលក្នុងគុម្ពស្មៅ ស្លាប់យ៉ាងអាណោចអាធ័ម ទាំងកណ្ដាលភ្លៀង ។ ចំណែកម្ចាស់រថយន្ដ បានបើកទ្វាររថយន្ដ រត់គេចពីកន្លែងកើតហេតុ សល់តែរថយន្តតែប៉ុណ្ណោះ ។

ក្រោយពេលកើតហេតុ សមត្ថកិច្ចជំនាញចុះមកធ្វើការវាស់វែង យករថយន្តនិងម៉ូតូ ទៅរក្សាទុកនៅការិយាល័យចរាចរណ៍ផ្លូវគោក នៃស្នងការដ្ឋាននគរបាលរាជធានីភ្នំពេញ រង់ចាំម្ចាស់ចូលខ្លួនមកធ្វើការដោះស្រាយគ្នាតាមផ្លូវច្បាប់។ ចំណែកសាកសពត្រូវបានសមត្ថកិច្ចប្រគល់អោយក្រុមគ្រួសារដើម្បីយកទៅធ្វើបុណ្យតាមប្រពៃណីនៅឯស្រុកកំណើត៕