រាជធានីភ្នំពេញ ៖ បុរសម្នាក់ជិះម៉ូតូ ដេញគ្នា បានជ្រុលមកបុករម៉កពីក្រោយ បណ្ដាលឲ្យស្លាប់បាត់បង់ជីវិត ពេលបញ្ជូនទៅកាន់មន្ទីរពេទ្យ កាលពីវេលាម៉ោង១១យប់ ថ្ងៃទី៨ ខែកញ្ញា ឆ្នាំ២០២១ នៅចំណុចសង្កាត់កន្ទោក ខណ្ឌកំបូល រាជធានីភ្នំពេញ។

សាកសពជនរងគ្រោះមានឈ្មោះ យីវ វិចិត្រ ទីកន្លែងកំណើតនៅឃុំព្រៃដំបង ស្រុកមុខកំពូល ខេត្តកណ្ដាល។

ប្រភពព័ត៌មានពីបងប្អូនប្រជាពលរដ្ឋបានឲ្យដឹងថា មុនពេលកើតហេតុ គេបានឃើញបុរសម្នាក់ ជិះម៉ូតូម៉ាក Suzuki Nex មួយគ្រឿង ដែលពាក់ស្លាកលេខ កំពង់ធំ 1K-2838 បើកប្រដេញគ្នាតាមផ្លូវយ៉ាងលឿន ដូចហោះ បានទៅបុករម៉កដឹកបន្លែពីក្រោយ បណ្ដាលឲ្យជនរងគ្រោះធ្លាយពោះវៀន ចេញមកក្រៅ ស្លាប់បាត់បង់ជិវិត នៅត្រង់ចំណុចកើតហេតុ ហើយភ្លាមនោះ រម៉កដឹកបន្លែបានជិះរត់បាត់ពីកន្លែងកើតហេតុ ។

ក្រោយកើតហេតុ សមត្ថកិច្ចជំនាញចរាចរណ៍ខណ្ឌកំបូល ក៏បានមកដល់បានធ្វើការវាស់វែង និងយកម៉ូតូទៅរក្សាទុកនៅអធិការដ្ឋាននគបាលខណ្ឌកំបូល ដើម្បីរង់ចាំសាច់ញាតិយកឯកសារមកទទួលយក និងប្រគល់សពឲ្យក្រុមគ្រួសារធ្វើបុណ្យតាមប្រពៃណី ៕