ខេត្តពោធិ៍សាត់ ៖ យោងតាមផេក អធិការដ្ឋាននគរបាលស្រុកក្រគរ បានឲ្យដឹងថា ជនសង្ស័យម្នាក់ ត្រូវបានសមត្ថកិច្ចធ្វើការចាប់ឃាត់ខ្លួន ខណៈចូលទៅក្នុងផ្ទះរបស់ប្រជាពលរដ្ឋ ធ្វើសកម្មភាពលួចរថយន្តរបស់ប្រជាពលរដ្ឋ បើកតាមផ្លូវជាតិលេខ៥ ឆ្ពោះទៅទិសខាងលិច កាលពីវេលាម៉ោង១០ និង៤០នាទីព្រឹក ថ្ងៃទី៨ ខែ កញ្ញា ឆ្នាំ២០២១ ក្នុងភូមិស្វាយគយ ឃុំពន្លៃ ស្រុកបរិបូរណ៌ ខេត្តកំពង់ឆ្នាំង ។
សមត្ថកិច្ចបានឲ្យដឹងថា ជនសង្ស័យមានឈ្មោះ ឃឹម សីហា ភេទប្រុស អាយុ២៣ឆ្នាំ ស្នាក់នៅភូមិ ឃុំ ស្រុក ខេត្តព្រៃវែង បានលួចរថយន្តម៉ាក PORSCHE ស៊េរីឆ្នាំ២០១២ ពណ៌ស ពាក់ស្លាកលេខ ភ្នំពេញ 2Q-2109 ។
ក្រោយទទួលបានព័ត៌មានពីម្ចាស់រថយន្តឈ្មោះ ហៀក វិឡៃ ភេទប្រុស អាយុ ៣២ឆ្នាំ រស់នៅភូមិស្វាយគយ ឃុំពន្លៃ ស្រុកបរិបូរណ៌ ខេត្តកំពង់ឆ្នាំង ភ្លាម លោក វរសេនីយ៍ឯក ឯម រុន ជាអធិការនគរបាលស្រុកក្រគរ បានបញ្ជាឲ្យកម្លាំងអន្តរាគមន៍ស្រុកក្រគរសហការណ៍ជាមួយ ប៉ុស្តិ៍នគរបាលរដ្ឋបាលក្បាលត្រាច ប៉ុស្តិ៍អន្លង់ត្នោត និងប្រជាការពារ ស្ទាក់ចាប់បានរថយន្ត និង ជនសង្ស័យនៅមុខមន្ទីពេទ្យបង្អែកស្រុកក្រគរ នៅលើផ្លូវជាតិលេខ៥ យកមកសួរនាំនៅអធិការនគរបាលស្រុកក្រក្រគរ រួចធ្វើកំណត់ហេតុប្រគល់ទាំងជនសង្ស័យ និងរថយន្ត ១គ្រឿង ទៅផ្នែកជំនាញនៃអធិការដ្ឋាននគរបាលស្រុកបរិបូរណ៍ តាមបញ្ជារបស់ឯកឧត្តម កូយ កាន់យ៉ា ព្រះរាជអាជ្ញាអមសាលាដំបូងខេត្តពោធិ៍សាត់ ដើម្បីចាត់ការបន្តរតាមនិតិវិធីច្បាប់បន្តទៀត៕
