រាជធានីភ្នំពេញ ៖ ជនសង្ស័យម្នាក់ ត្រូវបានសមត្ថកិច្ចប្រដេញចាប់ខ្លួនបានភ្លាមៗ ខណៈធ្វើសកម្មភាពវាយប្លន់យកម៉ូតូ នៅចំណុចក្រោមស្ពានព្រះមុនីវង្សចាស់ ហើយព្យាយាមរត់គេចខ្លួន កាលពីវេលាម៉ោង ៨ និង៣០នាទីយប់ ថ្ងៃទី៨ ខែកញ្ញា ឆ្នាំ២០២១ នៅចំណុចក្រោមស្ពានព្រះមុនីវង្សចាស់ ផ្លូវបេតុង ភូមិដើមចាន់ សង្កាត់ច្បារអំពៅ២ ខណ្ឌច្បារអំពៅ រាជធានីភ្នំពេញ ។
សមត្ថកិច្ចបានឲ្យដឹងថា ជនរងគ្រោះឈ្មោះ ថាន់ ប៊ី ភេទ ប្រុស អាយុ ៣៩ឆ្នាំ ជនជាតិវៀតណាម មុខរបរ កម្មករសំណង់ ស្នាក់នៅភូមិកណ្តាល សង្កាត់ច្បារអំពៅ២ ខណ្ឌច្បារអំពៅ។ ចំណែកជនសង្ស័យឈ្មោះ ជា រស្មី ហៅ បារាំង ភេទប្រុស អាយុ៣១ឆ្នាំ ជនជាតិខ្មែរ មុខរបរ មិនពិតប្រាកដ ស្នាក់នៅភូមិកណ្តាល សង្កាត់ច្បារអំពៅ២ ខណ្ឌច្បារអំពៅ(ប្រើប្រាស់គ្រឿងញៀន)។
សូមបញ្ជាក់ថា មុនពេលកើតហេតុជនរងគ្រោះ ជិះម៉ូតូម៉ាកហុងដាគុបមូលសេ៥០ ពណ៌ស ពាក់លេខ ភ្នំពេញ 1CY-3365 ឌុបកូនទៅផ្ទះ ពេលមកដល់ចំណុចកើតហេតុ ជនរងគ្រោះក៏បន្ថយល្បឿន ស្រាប់តែជនសង្ស័យដើរមកពីក្រោយ ចាប់ក្រៀកកកូនជនរងគ្រោះគំរាមថា ឲ្យម៉ូតូមកអញ ប្រយ័ត្នអញចាក់សម្លាប់ចោល និងវាយជនរងគ្រោះមួយដៃចំស្មាខាង ស្តាំ ពេលនោះជនរងគ្រោះភ័យក៏រត់ចោលម៉ូតូស្រែកចោរៗ រួចជនសង្ស័យក៏ប្លន់យកម៉ូតូជនរងគ្រោះជិះគេចខ្លួន ភ្លាមនោះ ក៏មានសមត្ថកិច្ចល្បាតឃើញដេញតាមជនសង្ស័យរហូតដល់សង្កាត់បឹងត្របែក ខណ្ឌចំការមន ក៏ឃាត់ខ្លួនជន សង្ស័យ រួមនិងម៉ូតូ០១គ្រឿងម៉ាកខាងលើ (ជារបស់ជនរងគ្រោះ) បញ្ជួនមកអធិការដ្ឋាននគរបាលខណ្ឌច្បារអំពៅ ចាត់ការ តាមច្បាប់៕ មេសា
