ខេត្តព្រះសីហនុ ៖ គ្រោះថ្នាក់ចរាចរណ៍មួយបានកើតឡើងរវាងរថយន្តនិងម៉ូតូ បានបុកគ្នាចំណុចស្តុបមួយកន្លែង បណ្តាលឲ្យភាគីម៉ូតូផ្លោងជាច្រើនម៉ែត្រ ធ្វើឲ្យអ្នកជិះម៉ូតូរបួសធ្ងន់ ខណៈរថយន្តស៊េរីទំនើបនោះ បានបន្តល្បឿនបើករត់បាត់តែម្តង បង្កការភ្ញាក់ផ្អើលនៅម៉ោង ៩ និង២៥នាទីយប់ ថ្ងៃទី៩ ខែកញ្ញា ឆ្នាំ២០២១ ក្នុងភូមិ២ សង្កាត់លេខ២ ក្រុងព្រះសីហនុ ខេត្តព្រះសីហនុ។
ប្រភពព័ត៌មាន ពីកន្លែងកើតហេតុ បានឲ្យដឹងថា មុនពេលកើតហេតុ គេឃើញ បុរសម្នាក់ បានជិះម៉ូតូមួយគ្រឿង ម៉ាក Scoopy បើកចុះពីផ្លូវបេនឡានមហោស្របចាស់ផ្លូវ១០៨ ឆ្លងស្តុបបម្រុងនឹងទៅផ្លូវ១០៧ ដល់ពាក់កណ្ដាលផ្លូវ ក៏ត្រូវបានរថយន្តមួយគ្រឿងទៀត ជារថយន្តស៊េរីទំនើប ម៉ាក អាល់ហ្វាត មិនចាំស្លាកលេខ បើកមកតាមបណ្ដោយវិថីឯករាជ បានបុកម៉ូតូពេញទំហឹងបណ្តាលឲ្យភាគីម៉ូតូផ្លោងជាច្រើនម៉ែត្រ ធ្វើឲ្យអ្នកជិះម៉ូតូរបួសធ្ងន់ត្រូវបានក្រុមគ្រួសារបញ្ជូនទៅសង្គ្រោះនៅមន្ទីរពេទ្យ ខណៈរថយន្តស៊េរីទំនើបនោះ បានបន្តល្បឿនបើករត់បាត់តែម្តង ៕
