រាជធានីភ្នំពេញ ៖ កម្លាំងព្រហ្មទណ្ឌ របស់អធិការនគរបាលខណ្ឌឫស្សីកែវ ធ្វើការចុះល្បាត ធ្វើការឃាត់ខ្លួនបានជនសង្ស័យចំនួន៣នាក់ ពាក់ព័ន្ធករណីជួញដូរគ្រឿងញៀន ដកហូតបានគ្រឿងញៀនមួយកញ្ចប់ធំ កាលពីយប់ថ្ងៃទី៩ ខែកញ្ញា ឆ្នាំ២០២១ នៅតាមបណ្តោយផ្លូវជាតិលេខ៥ ក្នុងសង្កាត់ស្វាយប៉ាក ខណ្ឌឫស្សីកែវ រាជធានីភ្នំពេញ ។
លោកវរសេនីយ៍ទោ ផល មេសា អធិការរងទទួលផែនព្រហ្មទណ្ឌ បានឲ្យដឹងថា មុនពេលកើតហេតុ គាត់បានដឹកនាំកម្លាំងតាមបណ្ដោយផ្លូវជាតិលេខ៥ ធ្វើការឃាត់សួរនាំ ទៅលើយុវជន៣នាក់ ក្នុងនោះក៏បានឆែកឆេររកឃើញនូវម្សៅសក្រាមថ្លាចំនួន១កញ្ចប់ធំ និងជញ្ជីងចំនួន១ ត្រូវបានសមត្ថកិច្ចធ្វើការ ឃាត់ខ្លួន បញ្ជូនទៅអធិការនគរបាលខណ្ឌឫស្សីកែវ ដើម្បីសួរនាំនិងធ្វើតាមនីតិវិធីច្បាប់។
បើតាមរបាយការណ៍របស់អធិការនគរបាលខណ្ឌឬស្សីកែវបានឲ្យដឹងថា ជនសង្ស័យទាំង៣នាក់ ដែលឃាត់ខ្លួនបាននោះរួមមាន៖
ទី១ ឈ្មោះ ទូន ប៉ុន ភេទប្រុស អាយុ ២៦ឆ្នាំ ស្នាក់នៅក្នុងសង្កាត់ជ្រោយចង្វារ ខណ្ឌជ្រោយចង្វារ ជាកម្មករសំណង់ ។
ទី២ ឈ្មោះ គុយ សុខដា ភេទប្រុស អាយុ ២៨ឆ្នាំ ស្នាក់នៅក្នុងការដ្ឋានសំណង់ ក្នុងសង្កាត់ជ្រោយចង្វារ រាជធានីភ្នំពេញ មុខរបរជាកម្មករសំណង់។
ទី៣ ឈ្មោះ ស៊ុន សុខមាន ភេទស្រី អាយុ២០ឆ្នាំ ស្នាក់នៅក្នុងការដ្ឋានសំណង់ ក្នុងសង្កាត់ជ្រោយចង្វា ខណ្ឌជ្រោយចង្វា រាជធានីភ្នំពេញ ។
បច្ចុប្បន្នជនសង្ស័យទាំង៣នាក់ ត្រូវបានសមត្ថកិច្ចបញ្ជួនសំណុំរឿងបន្តទៅតុលាការ ចាត់ការតាមនីតិវិធីច្បាប់បន្តទៀត ៕
