ខេត្តព្រះសីហនុ ៖ បុរសម្នាក់បានស្លាប់ និងស្ត្រី២នាក់ទៀតរងរបួស ក្នុងករណីគ្រោះថ្នាក់ចរាចរណ៍ ដែលបានកើតឡើងនៅវេលាម៉ោងជាង៧យប់ ថ្ងៃទី១២ ខែកញ្ញា ឆ្នាំ២០២១ តាមផ្លូវជាតិលេខ៤ ចន្លោះគីឡូម៉ែត្រលេខ ២១០-២១១ ក្នុងភូមិពូធឿង ឃុំបិតត្រាំង ស្រុកព្រៃនប់ ខេត្តព្រះសីហនុ ។

សមត្ថកិច្ចឲ្យដឹងថា គ្រោះថ្នាក់ចរាចរណ៍នេះបានកើតឡើង រវាងរថយន្ត០១គ្រឿង មិនស្គាល់ម៉ាក ក្នុងទិសដៅខេត្តព្រះសីហនុ -ភ្នំពេញ បានបុកប៉ះម៉ូតូ០១គ្រឿង ម៉ាកអ៊ិចសង់ទ័រ ពណ៌ខៀវ ពាក់ស្លាកលេខ ភ្នំពេញ 1GC-4487 ទិសដៅផ្ទុយគ្នា រួចខ្ទាតទៅប៉ះជាមួយម៉ូតូ០១គ្រឿងទៀត ម៉ាកZoomer-X ពណ៌ក្រហម ពាក់ស្លាកលេខ 1G-5314 បើកបរទិសដៅពីភ្នំពេញ-ខេត្តព្រះសីហនុ បណ្តាលឲ្យអ្នកបើកបរម៉ូតូ អ៊ិចសង់ទ័រ ស្លាប់យ៉ាងរន្ធត់ និងស្ត្រីអ្នកជិះម៉ូតូ Zoomer-X ចំនួន២នាក់ ទី១ឈ្មោះ ហៀប ហូងស្រី អាយុ១៩ឆ្នាំ ទីលំនៅភូមិចំណោតរាម ឃុំបិតត្រាំង ស្រុកព្រៃនប់ ខេត្តព្រះសីហនុ រងរបួសមធ្យម និងទី២ជាអ្នករួមដំណើរជាមួយឈ្មោះ នាក់ គ្រីសស្តា ភេទស្រី អាយុ២១ឆ្នាំ ទីលំនៅភូមិស្មាច់ដែង ឃុំរាម ស្រុកព្រៃនប់ ខេត្តព្រះសីហនុ រងរបួសមធ្យម។

ក្រោយកើតហេតុភាគីខាងរថយន្ត បានបើករត់គេចបាត់ សល់តែម៉ូតូ២គ្រឿង ប៉ុណ្ណោះ ត្រូវបានសមត្ថកិច្ចនគរបាលស្រុកព្រៃនប់ កំពុងស្រាវជ្រាវរក ដើម្បីដោះស្រាយបន្តតាមនិតិវិធីច្បាប់ ខណៈជនរងគ្រោះ ត្រូវបានបញ្ជូនទៅសង្គ្រោះនៅមន្ទីរពេទ្យ និងប្រគល់ឲ្យសាច់ញាតិធ្វើបុណ្យតាមប្រពៃណី៕