រាជធានីភ្នំពេញ ៖ រថយន្ដដឹកមាន់ បានបុកផាច់ជីវិតបុរសម្នាក់ កំពុងតែបើកម៉ូតូតាមផ្លូវ ក្នុងទិសដៅបញ្ច្រស់ទិសគ្នាពេញទំហឹង យ៉ាងរន្ធត់បំផុត កាលពីវេលាម៉ោង១ រំលងអាធ្រាត្រ ឈានចូលថ្ងៃទី១២ ខែកញ្ញា ឆ្នាំ២០២១ នៅចំណុចផ្លូវជាតិលេខ៤ ស្ថិតនៅសង្កាត់កន្ទោក ខណ្ឌកំបូល រាជធានីភ្នំពេញ ។

តាមប្រភពព័ត៌មានពីបងប្អូនប្រជាពលរដ្ឋ បានឲ្យដឹងថា មុនពេលកើតហេតុ គេបានឃើញរថយន្ត ទ្រុងដឹកមាន់ មួយគ្រឿង ដែលពាក់ស្លាកលេខ ភ្នំពេញ 2AR-0438 ធ្វើដំណើរតាមបណ្ដោយផ្លូវជាតិលេខ៤ ក្នុងទិសដៅពីកើតមកលិច មកដល់ចំណុចកើតហេតុ បានបុកម៉ូតូម៉ាកនិច មួយគ្រឿង ដែលពាក់ស្លាកលេខ ភ្នំពេញ 1DE-0001 បើកបរដោយបុរសម្នាក់ ក្នុងទិសដៅបញ្ច្រាស់គ្នា ក៏បានបុកគ្នាបណ្ដាលឲ្យគាបជាប់មនុស្សនៅក្រោមរថយន្ត ស្លាប់ភ្លាមៗនៅនឹងកន្លែងកើតហេតុ ។

សាកសពជនរងគ្រោះមានឈ្មោះ ហឿន សុផាត ភេទប្រុស អាយុ ៣០ឆ្នាំ មុខរបរចុងភៅ មានស្រុកកំណើត នៅភូមិគោហ៊េ ឃុំរកាកោងទី១ ស្រុកមុខកំពូល ខេត្តកណ្ដាល។

ក្រោយកើតហេតុ សមត្ថកិច្ចបានទំនាក់ទំនងហៅបងប្អូននិងក្រុមគ្រួសារសាច់ញាតិឲ្យមកទទួលយកសាកសព យកទៅធ្វើបុណ្យតាមប្រពៃណីនៅឯស្រុកកំណើត។ ចំណែកឯម៉ូតូនិងរថយន្ត ត្រូវបានសមត្ថកិច្ចធ្វើការវាស់វែង យកទៅរក្សាទុកនៅការិយាល័យចរាចរណ៍ផ្លូវគោក នៃស្នងការដ្ឋាននគរបាលរាជធានីភ្នំពេញ រង់ចាំដោះស្រាយគ្នាតាមច្បាប់បន្តទៀត ៕