រាជធានីភ្នំពេញ ៖ ក្មេងប្រុស២នាក់ បាននាំគ្នាទៅស្ទូចត្រី នៅចំណុចប្រឡាយទើបជីកកាយថ្មី ស្របផ្លូវរថភ្លើង អកុសលរអិលជើងលង់ទឹកបាត់ខ្លួនទាំង២នាក់ ផ្អើលសាច់ញាតិ អ្នកភូមិ ជាច្រើននាក់ នាំគ្នាចុះបង់សំណាញ់រាវរក តាំងពីម៉ោង១រសៀលថ្ងៃទី១១ ខែកញ្ញា ឆ្នាំ២០២១ តែម៉ោង៣ ទៅ៤ល្ងាចទើបផ្អើល នាំគ្នាចុះរាវ រកឃើញម្នាក់ នៅម្នាក់ រហូតមកដល់ព្រឹកថ្ងៃទី១២ ខែកញ្ញា ឆ្នាំ២០២១ ទើបរកឃើញសាកសពម្នាក់ទៀត ក្នុងភូមិវាល សង្កាត់ត្រពាំងក្រសាំង ខណ្ឌពោធិសែនជ័យ រាជធានីភ្នំពេញ។
សមត្ថកិច្ចបានឲ្យដឹងថា ក្មេងទាំង២នាក់ ដែលលង់ទឹកស្លាប់ ទី១ឈ្មោះ ជា លីហ័រ ភេទប្រុស អាយុ៦ឆ្នាំ ស្នាក់នៅក្រុងតាខ្មៅ ខេត្តកណ្តាល និងទី២ឈ្មោះ នឿន សេងហុង ភេទប្រុស អាយុ៨ឆ្នាំ ស្នាក់នៅភូមិកើតហេតុខាងលើ ទាំង២នាក់ ជាបងប្អូនជីដូនមួយនឹងគ្នា។
តាមប្រភពព័ត៌មានបានឲ្យដឹងថា មុនពេលកើតហេតុ ឪពុកម្តាយបងប្អូនមិននៅផ្ទះ ក្មេងប្រុសទាំង២នាក់ បាននាំគ្នាទៅស្ទូចត្រី នៅចំណុចកើយហេតុ ដែលឆ្ងាយពីផ្ទះជាង១០០ម៉ែត្រ ពេលនោះមិនដឹងយ៉ាងម៉េច ស្រាប់តែរអិលជើងធ្លាក់ទឹក លង់លិចបាត់ក្មេងម្នាក់ ទើបក្មេងម្នាក់ទៀត ដែលត្រូវជាបងប្អូនជីដូនមួយនឹងគ្នា ជួយចាប់ បណ្តាលឲ្យធ្លាក់លង់បាត់ខ្លួនទាំង២នាក់តែម្តង ។
ក្រោយកើតហេតុ សមត្ថកិច្ចនគរបាលជំនាញ បានចុះមកធ្វើកោសល្យវិច័យទៅលើសាកសពក្មេងរងគ្រោះទាំង២នាក់ ខណៈឪពុកម្តាយ បានត្រឹមឱបរូបថតកូនជាទីស្រឡាញ់ យំសោកបោកខ្លួនតែប៉ុណ្ណោះ និងធ្វើបុណ្យតាមប្រពៃណី ៕
