រាជធានីភ្នំពេញ ៖ មនុស្សចំនួន០២នាក់ បានរងរបួសធ្ងន់ស្រាល ត្រូវបានដឹកយកទៅសង្គ្រោះបន្ទាន់នៅមន្ទីរពេទ្យភ្លាមៗ ក្រោយជួបគ្រោះថ្នាក់ចរាចរណ៍រវាងម៉ូតូនិងម៉ូតូ នៅចំណុចផ្លូវR8 សង្កាត់ស្រះចក ខណ្ឌដូនពេញ រាជធានីភ្នំពេញ វេលាម៉ោង១១និង៣០នាទីព្រឹក ថ្ងៃទី១៤ ខែកញ្ញា ឆ្នាំ២០២១ ។

ប្រភពព័ត៌មានពីកើតហេតុបានឲ្យដឹងថា មុនពេលកើតហេតុ គេឃើញម៉ូតូ ម៉ាក Suzuki Let’s ពណ៌ប្រផេះ ស្លាកលេខ ព្រៃវែង 1P-4812 បើកបរដោយបុរសម្នាក់ ជាអ្នកជញ្ជូនតាមអនឡាញ ធុងពណ៌ខៀវ បើកបរក្នុងល្បឿនលឿន បើកបរពីជើងទៅត្បូង មកដល់ចំណុចផ្លូវបែកជាបួន បត់ឆ្វេងមិនប្រុងប្រយ័ត្ន ស្រាប់តែម៉ូតូដឹកជញ្ជូនញ៉ាំ២៤ម៉ោង ម៉ាក Honda Dream ពណ៌ខ្មៅ ស្លាកលេខ ភ្នំពេញ 1IC-2609 បើកបរក្នុងល្បឿនដែរ បើកបរពីត្បូងទៅជើង បុកចំពីមុខម៉ូតូ Suzuki Let’s ពេញទំហឹងតែម្តង បណ្តាលឲ្យរងការខូចខាត និងរងរបួសធ្ងន់ទាំងសងខាង ភ្លាមៗរថយន្តសាម៉ុយបានដឹកយកជនរងគ្រោះទៅសង្គ្រោះបន្ទាន់នៅឯមន្ទីរពេទ្យ។

ក្រោយពេលកើតហេតុ សមត្ថកិច្ចបានចុះមកទីតាំងកន្លែងកើតហេតុ ធ្វើការ វាស់វែងយកម៉ូតូទាំងពីរគ្រឿង ទៅរក្សានៅអធិការដ្ឋាននគរបាលខណ្ឌដូនពេញ ដើម្បីរងចាំដោះស្រាយគ្នានៅពេលក្រោយ ៕