រាជធានីភ្នំពេញ ៖ បុរសជាងផ្សារដែកម្នាក់ លើកដែកផ្សារដំបូលប៉ះខ្សែភ្លើង ស្រាតឆក់ធ្លាក់ពីលើដំបូលកម្ពស់៥ម៉ែត្រ រងរបួសធ្ងន់ ត្រូវបានរថយន្តសង្គ្រោះបន្ទាន់របស់មន្ទីរពេទ្យដង្កោ ដឹកយកទៅជួយសង្គ្រោះភ្លាមៗ កាលពីវេលាម៉ោង៩និង២០នាទីព្រឹកថ្ងៃទី១៥ ខែកញ្ញា ឆ្នាំ២០២១ ត្រង់ចំណុចផ្លូវបេតុង៥០ម៉ត្រ ស្ថិតនៅភូមិបាគូ សង្កាត់ដង្កោ ខណ្ឌដង្កោ រាជធានីភ្នំពេញ។

តាមប្រភពព័ត៌មានបានប្រាប់ក្រុមការងារ TVFB បានឲ្យដឹងថា មុនពេលកើតហេតុ បុរសដែលជាជនរងគ្រោះ ដែលជាមេជាង បាននាំកូនជាងប្រមាណជាង៤ ទៅ៥នាក់ បានមកផ្សារដំបូលនៅឃ្លាំងនៅកន្លែងកើតហេតុ ពេលដែលកំពុងតែផ្សារ ស្រាប់តែកូនជាងបាននាំគ្នាចុះមកក្រោមអស់ ដើម្បីផឹកទឹក ពេលនោះជនរងគ្រោះក៏បានចុះមកតាមក្រោយ ហើយក៏បានយកដែកមួយដើមទៀតលីឡើងទៅលើដើម្បីផ្សារបន្ត ក៏លើកដែកឡើងទៅប៉ះជាមួយនឹងខ្សែកាប បណ្ដាលឲ្យឆក់ធ្លាក់ពីលើមកក្រោមកម្ពស់៦ម៉ែត្រ បណ្ដាលឲ្យរងរបួសធ្ងន់ ភ្លាមៗនោះជនរងគ្រោះត្រូវបានរថយន្តរបស់មន្ទីរពេទ្យដង្កោ ដឹកយកទៅជួយសង្គ្រោះ តែសារតែស្ថានភាពជំងឺជនរងគ្រោះធ្ងន់ធ្ងរខ្លាំងពេក លោកគ្រូពេទ្យបានបញ្ជូនជនរងគ្រោះទៅសង្គ្រោះបន្ទាន់នៅមន្ទីរពេទ្យលោកសង្ឃបន្តទៀត ។

ក្រោយពេលកើតហេតុសមត្ថកិច្ចប៉ុស្តិ៍នគរបាលរដ្ឋបាលដង្កោបានចុះដល់ទីតាំងកន្លែងកើតហេតុ និងបានត្រួតពិនិត្យនៅទីតាំងខាងលើហើយក៏បានអោយផ្អាកដំណើរការជាបណ្ដោះអាសន្នផងដែរ ៕ មេសា