រាជធានីភ្នំពេញ ៖ ស្ត្រីម្នាក់ បានរងរបួសធ្ងន់ ត្រូវបានបញ្ជូនទៅសង្គ្រោះបន្ទាន់នៅមន្ទីរពេទ្យ ខណៈជួបគ្រោះថ្នាក់ ចរាចរណ៍រវាង រថយន្តឡិចស៊ីស RX-330 មួយគ្រឿង បុកជាមួយ ម៉ូតូសង់ដែលកំពុងឆ្លងផ្លូវពេញទំហឹង ហោះមនុស្សផ្លោងបោកជាមួយក្បាលរថយន្ត រងការខូចខាតយ៉ាងដំណំផ្នែកខាងមុខ កាលពីវេលាម៉ោង ៣ និង៥១នាទី រសៀលថ្ងៃទី១៧ ខែកញ្ញា ឆ្នាំ២០២១ នៅលើផ្លូវជាតិលេខ៣ ក្នុងភូមិស្រែញរ សង្កាត់ពងទឹក ខណ្ឌដង្កោ រាជធានីភ្នំពេញ។

បើតាមប្រភពព័ត៌មានពីបងប្អូនប្រជាពលរដ្ឋ នៅទីតាំងកើតហេតុ បានប្រាប់ក្រុមការងារ TVFB ឲ្យដឹងថា មុនពេលកើតហេតុ គេឃើញរថយន្តម៉ាកឡិចស៊ីស RX-330 មួយគ្រឿងនោះ ពណ៌ផ្ទៃមេឃ ពាក់ស្លាកលេខភ្នំពេញ 2AW-6395 បើកបរពីត្បូងទៅជើងសង្ស័យក្នុងល្បឿនលឿន លុះដល់ចំណុចកើតហេតុ ក៏ជួបគ្រោះថ្នាក់ជាមួយម៉ូតូម៉ាកហុងដាសេ១២៥ ពណ៌ខ្មៅ ពាក់ស្លាកលេខ ភ្នំពេញ 1GX-4076 ដែលជិះដោយស្ត្រីម្នាក់ ពេញទំហឹង បណ្ដាលឲ្យស្ត្រីរងគ្រោះ រងរបួសធ្ងន់ធ្ងរ ត្រូវបានបញ្ជូនទៅសង្គ្រោះបន្ទាន់នៅមន្ទីរពេទ្យ ។

ភ្លាមៗគេឃើញ មានកម្លាំងនគរបាលប៉ុស្តិ៍ពងទឹក និងនគរបាលចរាចរណ៍ខណ្ឌដង្កោ បានចុះទៅកាន់កន្លែងកើតហេតុ ធ្វើការវាស់វែង យករថយន្ត និងម៉ូតូ ទៅរក្សាទុករង់ចាំការដោះស្រាយ គ្នាតាមច្បាប់បន្តទៀត ៕មេសា