រាជធានីភ្នំពេញ ៖ បុរសម្នាក់បើកបររថយន្តស៊េរីទំនើប មិនប្រុងប្រយ័ត្ន បណ្ដាលឲ្យបុករបាំងពុះចែកទ្រូងផ្លូវបង្កការភ្ញាក់ផ្អើល និងរងការខូចខាតខ្ទេចរថយន្តយ៉ាងដំណំ កាលពីវេលាម៉ោង៧ និង១០នាទីយប់ ថ្ងៃទី១៩ ខែកញ្ញា ឆ្នាំ២០២១ នៅតាមបណ្ដោយផ្លូវ២៨៩ ក្នុងសង្កាត់បឹងកក់ទី១ ខណ្ឌទួលគោក រាជធានីភ្នំពេញ ។

ប្រភពព័ត៌មាននៅកន្លែងកើតហេតុ បានឲ្យដឹងថា មុនពេលកើតហេតុ គេបានឃើញបុរសម្នាក់ បើករថយន្ត Range Rover មួយគ្រឿង ដែលពាក់ស្លាកលេខ ភ្នំពេញ 2AG-0097 ក្នុងល្បឿនយ៉ាងលឿន បានរ៉េចង្កូតឡើងលើរបាំងថ្មចែកទ្រូងផ្លូវ ពេញទំហឹង បណ្ដាលឲ្យរងការខូចខាតយ៉ាងដំណំ។ ចំណែកឯអ្នកបើករថយន្តវិញ ពុំមានរងរបួសឡើយ។

ក្រោយពេលកើតហេតុ សមត្ថកិច្ចមូលដ្ឋានបានទាក់ទងសមត្ថកិច្ចជំនាញចរាចរណ៍របស់ស្នងការនគរបាលរាជធានីភ្នំពេញ ធ្វើការវាស់វែង និងស្ទូចរថយន្តយកទៅរក្សាទុកនៅស្នងការនគរបាលរាជធានីភ្នំពេញ រង់ចាំម្ចាស់ចូលមកដោះស្រាយទៅតាមផ្លូវច្បាប់ ៕ Mrr Tra