រាជធានីភ្នំពេញ ៖ រថយន្តបែនដឹកដី មួយគ្រឿង បើកបរមិនប្រយ័ត្នកៀរម៉ូតូដួលចូលក្រោមរថយន្តទាំងមនុស្សនិងម៉ូតូ កិនម៉ូតូខ្ទេចខូចខាតទាំងស្រុង សំណាងល្អទឹកដោះម្តាយថ្លៃជនរងគ្រោះគ្រាន់តែរងរបួសស្រាល កាលវេលាម៉ោង ១១និង៣០នាទីព្រឹក ថ្ងៃទី២០ខែកញ្ញា ឆ្នាំ២០២១ ស្ថិតនៅតាមបណ្ដោយផ្លូវ៥០ម៉ែត្រ ភូមិព្រែកថ្លឹង សង្កាត់ជើងឯក ខណ្ឌដង្កោ រាជធានីភ្នំពេញ។

សមត្ថកិច្ចបានឲ្យដឹងថាជនរងគ្រោះមានឈ្មោះ ឈុន ដាលីន ភេទប្រុ អាយុ ១៨ ឆ្នាំ មុខរបរកម្មរោងចក្រពូក ស្នាក់នៅភូមិក្រពើទ្រោម សង្កាត់រលួស ខណ្ឌដង្កោ រាជធានីភ្នំពេញ។

បើយោងតាមប្រភពព័ត៌មានពីជនរងគ្រោះបានបានបញ្ជាក់ប្រាប់ក្រុមការងារ TVFB ឲ្យដឹងថាមុនពេលកើតហេតុ រូបគេបានជិះម៉ូតូម៉ាកឌ្រីមសង់សេ១២៥ ស៊េរី០១៩ ពណ៌ខ្មៅ ពាក់ស្លាកលេខ ភ្នំពេញ1HM-5371 មកទិញបាយម្ហូបយកទៅអោយមិត្តភ័ក្តិធ្វើការនៅក្រុងតាខ្មៅ បានធ្វើដំណើរតាមបណ្ដោយផ្លូវ៥០ម៉ែត្រ ទិសដៅពីលិចទៅកើត ខណៈមកដល់ចំណុចកើតហេតុ មានការកកស្ទះចរាចរាណ៍ក៏បានអង្អង់ឈប់ ស្របពេលមានរថយន្តមួយគ្រឿងម៉ាកហ៊ីយ៉ាន់ដាយ ពណ៌ទឹកប្រាក់ ពាក់ស្លាកលេខ ស្វាយរៀង 3B-6666 បើកបរដោយបុរសម្នាក់ធ្វើដំណើរស្របគ្នាបើកមកពីកក្រោយ កៀរម៉ូតូទាំងមនុស្សដួលចូលក្រោមរថយន្តកិនម៉ូតូខ្ទេច រងការខូចខាតទាំងស្រុង សំណាងល្អទឹកដោះម្តាយថ្លៃជនរងគ្រោះគ្រាន់តែរងរបួសស្រាល។

ក្រោយមករថយន្តបង្កមិនបានឈប់ដោះស្រាយគ្នានោះទេព្យាយាមបើករត់គេចសមត្ថកិច្ចដេញឃាត់បានត្រង់ចំណុចការដ្ឋានខ្សាច់នៅផ្លូវ៦០ម៉ែត្រអោយម្ចាស់ទៅធ្វើការដោះស្រាយគ្នានៅចំណុចកើតហេតុវិញ។

ក្រោយពេលកើតហេតុសមត្ថកិច្ចមូលដ្ឋានបានចុះទៅដល់ត្រួតពិនិត្យយកន្លែងកើតហេតុធ្វើការវាស់វែងរួចទុកពេលអោយភាគីទាំង២ធ្វើការសម្របសម្រួលគ្នា ដោយភាគីខាងរថយន្តព្រមចេញសំណងទៅអោយភាគីខាងម៉ូតូដើម្បីបញ្ចប់រឿងនៅកន្លែងកើតហេតុ ៕ មេសា