រាជធានីភ្នំពេញ ៖ បុរសម្នាក់បើកបររថយន្តមួយគ្រឿងល្បឿនលឿន ចូលតាមច្រកឌឿងហែមផ្ទះបងប្អូនប្រជាពលរដ្ឋ បានបុករទេះលក់ភេសជ្ជៈ រួចបន្តបើករត់គេច ទៅបុកកង់បីប្រជាពលរដ្ឋថែមទៀត ផ្អើលដល់កម្លាំងសមត្ថកិច្ចមូលដ្ឋាន សហការជាមួយកម្លាំងកងរាជអាវុធហត្ថ ធ្វើការអន្តរាគម៍ឃាត់ខ្លួនបានភ្លាមៗនាំយកទៅសាកសួរ កាលពីវេលាម៉ោង១១និង២០នាទីយប់ ថ្ងៃទី២០ ខែកញ្ញា ឆ្នាំ២០២១ តាមបណ្ដោយផ្លូវមហាវិថីសុធារស ចំណុចផ្សាររន្ទះបាញ់ ក្នុងសង្កាត់ទន្លេបាសាក់ ខណ្ឌចំការមន រាជធានីភ្នំពេញ។

យោងតាមប្រភពព័ត៌មាននៅទីតាំងកន្លែងកើតហេតុ បានឲ្យដឹងថា មុនពេលកើតហេតុ គេបានឃើញបុរស ម្នាក់បើកបររថយន្តមួយគ្រឿងម៉ាក កូរ៉ូឡា ពណ៌ខ្មៅ ស្លាកលេខ ភ្នំពេញ2H-8431 ធ្វើដំណើរតាមបណ្តោយផ្លូវមហាវិថីសុធារស ពីកើតទៅលិច ដល់ត្រង់ចំណុចច្រកផ្លូវឌឿងហែម បើកលឿនពេក ក៏ជ្រុលទៅបុកនិងរទេះលក់ភេសជ្ជៈ ផ្អើលកម្លាំងសមត្ថកិច្ចមូលដ្ឋាន បានធ្វើការអន្តរាគម៍ប្រដេញតាមរថយន្តពីក្រោយ តែបុរសដែលជាអ្នកបើកបររថយន្តមិនព្រមឈប់ទេ ក៏បន្ថែមល្បឿនជិះរត់គេច ក៏ជ្រុលទៅបុកជាមួយនិងកង់បីរបស់ប្រជាពលរដ្ឋបន្ថែមទៀត។

ប្រភពដដែលបន្តថា ស្របពេលនោះ រថយន្តក៏នៅតែបន្តបើករត់គេចចេញពីកន្លែងកើតហេតុ ត្រូវបានកម្លាំងសមត្ថកិច្ចមូលដ្ឋាននៅតែបន្តប្រដេញតាមពីក្រោយ រថយន្តខាងលើក៏បើករត់គេចដល់ត្រង់ចំណុចភូមិ៩ ច្រកចូលផ្សាររន្ទះបាញ់ មិនបន្ថយល្បឿន ក៏រេចង្កូចបុកចូលផ្ទះប្រជាពលរដ្ឋពេញទំហឹង បណ្តាលឲ្យរងការខូចខាតរបងទ្វារកញ្ចក់ផ្ទះប្រជាពលរដ្ឋ ចណៈរថយន្តបង្កវិញ រងការខូចខាតយ៉ាងដំណំបើកបរទៅមុខលែងរួច ទើបសម្ថកិច្ចធ្វើការឃាត់ខ្លួនបុរសជាម្ចាស់រថយន្តភ្លាមៗបញ្ជូនទៅសាកសួរតែម្តង ។

ក្រោយពេលកើតហេតុសមត្ថកិច្ចជំនាញផ្នែកចរាចរណ៍បានធ្វើការវាស់វែង និងបានយករថយន្តរួមទាំងម្ចាស់រថយន្តយកទៅកាន់ការិយាល័យចរាចរណ៍ផ្លូវគោក នៃស្នងការដ្ឋាននគរបាល រាជធានីភ្នំពេញ ដើម្បីរង់ចាំធ្វើការសួរនាំ និងបន្តចាត់ការតាមនិតិវិធីច្បាប់បន្តទៀត ៕ Mrr Ka