រាជធានីភ្នំពេញ ៖ ប្រជាពលរដ្ឋមានការភ្ញាក់ផ្អើល ខណៈមានផ្សែងហុយចេញពីខាងក្នុង នៃអាគារជាន់ទី៤ កំពុងសាងសង់មួយកន្លែង យ៉ាងខ្មួរខ្មាញ់ ប្រញាប់រាយការណ៍ជូនសមត្ថកិច្ចដើម្បីចុះមកអន្តរាគមន៍បាញ់ពន្លត់ កាលពីវេលាម៉ោង១និង៤៥នាទីរសៀល ថ្ងៃទី២២ ខែកញ្ញា ឆ្នាំ២០២១ តាមផ្លូវជាតិលេខ១ ក្នុងភូមិបឹងឈូក សង្កាត់និរោធ ខណ្ឌច្បារអំពៅ រាជធានីភ្នំពេញ។

ប្រភពព័ត៌មានពីសមត្ថកិច្ចបានបញ្ជាក់ប្រាប់ក្រុមការងារ TVFB ឲ្យដឹងថា មុនពេលកើតហេតុ គឺមានជាងបានឡើងផ្សារដែក ក៏ធ្លាក់កម្ទេចភ្លើងបង្កជាអគ្គិភ័យឆាបឆេះ ចេញពីខាងក្នុងនៃអាគារសាងសង់មួយកន្លែងនៅជាន់ទី៤ យ៉ាងសន្ធោសន្ធៅ ភ្លាមៗត្រូវបានរថយន្តបង្កនិងពន្លត់អគ្គិភ័យ ចុះមកអន្តរាគមន៍ ធ្វើការបាញ់ទប់ស្កាត់ ទើបរលត់ទៅវិញ ហើយក្នុងនោះដែលក៏មិនបណ្ដាលឲ្យមានអ្នកណាម្នាក់រងរបួសឡើយ។

ចំពោះករណីអគ្គិភ័យនេះត្រូវបានពន្លត់បានទាំងស្រុង ដោយប្រើប្រាស់រថយន្តពន្លត់អគិ្គភ័យរបស់ការិយាល័យអគ្គិភ័យ រាជធានីភ្នំពេញ ចំនួន ៣គ្រឿង ប្រើប្រាស់ទឹកអស់ ១ឡាន ស្មើរនឹង ៤ម៉ែត្រគូប និងរថយន្តជំនួយ បុរី ប៉េងហួត បឹងស្នោ ចំនួន ១គ្រឿង ប្រើប្រាស់ទឹកអស់ ១ឡាន ស្មើរនឹង៨ម៉ែត្រគូបផងដែរ ៕មេសា