រាជធានីភ្នំពេញ ៖ រថយន្ដមិនស្គាល់ម៉ាកមួយគ្រឿង បានបុកម៉ូតូគ្រឿង ដែលជិះឌុបគ្នា២នាក់ ខ្ទាតចូលរថយន្តម៉ាកឡិចស៊ីសមួយគ្រឿងទៀត បណ្ដាលឲ្យកិនបុរសម្នាក់ស្លាប់យ៉ាងរន្ធត់ និងម្នាក់ទៀតរបួសធ្ងន់ ត្រូវបានបញ្ជូនទៅសង្គ្រោះនៅមន្ទីរពេទ្យ កាលពីវេលាម៉ោង ៨យប់ ថ្ងៃទី២២ ខែកញ្ញា ឆ្នាំ២០២១ នៅតាមបណ្តោយផ្លូវបេតុង ក្នុងសង្កាក់ទួលសង្កែ ខណ្ឌឫស្សីកែវ រាជធានីភ្នំពេញ ។

ប្រភពព័ត៌មានពីកន្លែងកើតហេតុ បានឲ្យដឹងថា មុនពេលកើតហេតុ គេបានឃើញ បុរស២នាក់ ដែលជាកម្មកសំណង់ បានជិះម៉ូតូម៉ាក Suzuki Let’s មួយគ្រឿង ពាក់ស្លាកលេខ ភ្នំពេញ 1CK-1932 តាមបណ្ដោយផ្លូវបេតុង ពីលិចទៅកើត ពេលជិះមកដល់ចំណុចកើតហេតុ ក៏មានរថយន្ដមិនស្គាល់ម៉ាកមួយគ្រឿង មកបុកម៉ូតូជនរងគ្រោះ ពេញទំហឹងបណ្តាលឲ្យខ្ទាតមនុស្សចូលក្រោមរថយន្តម៉ាកឡិចស៊ីស RX400h ដែលពាក់ស្លាកលេខ ភ្នំពេញ 2BA-0607 ដែលបើកស្របគ្នា បណ្ដាលឲ្យកិនបុរសដែលជាអ្នកបើកម៉ូតូ ស្លាប់យ៉ាងរន្ធត់បំផុត ខណៈអ្នកជិះពីក្រោយម្នាក់ទៀត រងរបួសធ្ងន់ ត្រូវបានបញ្ជូនទៅសង្គ្រោះបន្ទាន់នៅមន្ទីរពេទ្យ ហើយភ្លាមៗនោះ រថយន្តបង្កមិនចាំម៉ាកនោះ ក៏បានបន្តល្បឿនបើករត់បាត់ស្រមោលតែម្តង សល់តែម៉ូតូជនរងគ្រោះ និងរថយន្តឡិចស៊ីសតែប៉ុណ្ណោះ ។

ក្រោយកើតហេតុ សមត្ថកិច្ចនគរបាលចរាចរណ៍មូលដ្ឋាន សហការជាមួយនគរបាលចរាចរណ៍ក្រុង បានចុះមកធ្វើការវាស់វែង យកទាំងម៉ូតូនិងរថយន្ត ទៅរក្សាទុកនៅការិយាល័យចរាចរណ៍ផ្លូវគោក នៃស្នងការដ្ឋាននគរបាលរាជធានីភ្នំពេញ រង់ចាំដោះស្រាយគ្នាតាមច្បាប់ និងប្រគល់សពឲ្យសាច់ញាតិ ធ្វើបុណ្យតាមប្រពៃណី ៕ Mrr Ka