រាជធានីភ្នំពេញ ៖ មនុស្សប្រុសស្រីយ៉ាងហោចណាស់ចំនួន០៤នាក់ ធ្វើដំណើរក្នុងកង់បីឥណ្ឌាមួយគ្រឿងបានរងរបួសធ្ងន់ស្រាល ត្រូវបានបញ្ជូនទៅមន្ទីរពេទ្យភ្លាមៗ ក្នុងករណីគ្រោះថ្នាក់ចរាចរណ៍ រវាងរថយន្តស៊េរីទំនើប បុកម៉ូតូជាមួយកង់បី បណ្ដាលឲ្យក្រឡាប់ កាលពីវេលាម៉ោង០២ និង៣០នាទី រសៀលថ្ងៃទី២៣ ខែកញ្ញា ឆ្នាំ២០២១ នៅតាមបណ្ដោយផ្លូវលេខ១០៨ កែងផ្លូវលេខ៥១ សង្កាត់វត្តភ្នំ ខណ្ឌដូនពេញ រាជធានីភ្នំពេញ។

ប្រភពព័ត៌មានពីកន្លែងកើតហេតុបានឲ្យដឹងថា មុនពេលកើតហេតុគេឃើញមាន ម៉ូតូកង់បីឥណ្ឌា ពណ៌ស ពាក់ស្លាកលេខ ភ្នំពេញ 1HK- 6331 ជិះគ្នា០៤នាក់ រួមមានម្ដាយ កូន២នាក់ និងអ្នកបើកម៉ូតូកង់បីឥណ្ឌា តាមបណ្ដោយផ្លូវលេខ៥១ ពីជើងទៅត្បូង លុះដល់ចំណុចកើតហេតុ ផ្លូវកែងបំបែកជាបួន ក៏មានរថយន្តម៉ាក Lexus 570 ពណ៌ខ្មៅ ពាក់ស្លាកលេខ ភ្នំពេញ 2Q -0168 ធ្វើដំណើរតាមបណ្ដោយផ្លូវលេខ១០៨ ពីកើតទៅលិច ក្នុងល្បឿនលឿនល្មម បានជ្រុលទៅបុកកង់បីឥណ្ឌា បណ្ដាលឲ្យកង់បីឥណ្ឌាក្រឡាប់ ខូចខាតបែកកញ្ចក់ផ្នែកខាងមុខ និងបណ្ដាលឲ្យមនុស្សចំនួន០៤នាក់ ប្រុសស្រីរួមទាំងកូនក្មេងចំនួន០២ រងរបួសធ្ងន់ស្រាល បញ្ជូនទៅមន្ទីរពេទ្យភ្លាមៗ។

ក្រោយពេលកើតហេតុ សមត្ថកិច្ចនគរបាលមូលដ្ឋាន បានចុះមកដល់ទីតាំងកើតហេតុ ដើម្បីសម្រួលចរាចរណ៍ និងទុកពេលឲ្យភាគីទាំង២ ធ្វើការចរចារគ្នា តែបើមិនត្រូវរ៉ូវគ្នាទេ នឹងប្រគល់ឲ្យសមត្ថកិច្ចធ្វើការវាស់វែងតាមច្បាប់ ដើម្បីដោះស្រាយគ្នាបន្ត ៕ នង មឿន