រាជធានីភ្នំពេញ ៖ សភាពសពបុរសម្នាក់ បានដាច់កញ្ចឹងកស្លាប់យ៉ាងរន្ធត់ បែកឈាមទាំងថ្លុក ខណៈជិះម៉ូតូមួយគ្រឿង សង្ស័យលឿនខ្លាំង បានទៅបុកចិញ្ចើមផ្លូវ ហោះមនុស្សមកបុកនឹងដែកស្លាកសញ្ញាបុកចំក តែម្តង បង្កការភ្ញាក់ផ្អើលនៅវេលាម៉ោង ៥និង៣០នាទីព្រឹក ថ្ងៃទី២៤ ខែកញ្ញា ឆ្នាំ២០២១នេះ នៅតាមបណ្ដោយផ្លូវព្រះមុនីវង្ស ក្នុងសង្កាត់បឹងព្រលឹត ខណ្ឌ៧មករា រាជធានីភ្នំពេញ។

សមត្ថកិច្ចបានឲ្យដឹងថា សពបុរសខាងលើមានឈ្មោះ ផេង សុខ មករា ភេទប្រុស អាយុ២៣ឆ្នាំ មានស្រុកកំណើតនៅភូមិចុងកោះ សង្កាត់ផ្សារឆ្នាំង ក្រុងកំពង់ឆ្នាំង ខេត្តកំពង់ឆ្នាំង។

តាមប្រភពព័ត៌មានពីប្រជាពលរដ្ឋនៅកន្លែងកើតហេតុ បានឲ្យដឹងថា មុនពេលកើតហេតុ គេបានឃើញ បុរសម្នាក់ ជិះម៉ូតូមួយគ្រឿងម៉ាកស៊ុយសាគីស្តេប ពណ៌ខ្មៅ ពាក់ផ្លាកលេខ ភ្នំពេញ1R-5141 ពីជើងទៅត្បូងសង្ស័យក្នុងល្បឿនយ៉ាងលឿន បុកចិញ្ចើមផ្លូវ ខ្ទាតទៅបុកនឹងបង្គោលដែកស្លាកសញ្ញា ដាច់ក បែកក្បាល បែកឈាមទាំងថ្លុកយ៉ាងរន្ធត់ភ្លាមៗតែម្តង ។

ក្រោយកើតហេតុ សមត្ថកិច្ចបានចុះមកធ្វើការពិនិត្យវាស់វែង និងបានទាក់ទងហៅរថយន្តសាមុយ មកដឹកយកទៅតម្កល់ទុក នៅវត្តទឹកថ្លា រង់ចាំសាច់ញាតិមកទទួលទៅធ្វើបុណ្យតាមប្រពៃណី ខណៈម៉ូតូត្រូវបានសមត្ថកិច្ចយកទៅរក្សាទុក ដើម្បីរង់ចាំសាច់ញាតិមកទទួលយកទៅវិញនាពេលក្រោយផងដែរ ៕