ខេត្តតាកែវ ៖ យោងតាមផេក អធិការដ្ឋានដ្ឋាននគរបាលស្រុកត្រាំកក់ បានឲ្យដឹងថា ជនសង្ស័យ០២នាក់ប្រដាប់ដោយកាំបិតបុង័តោ ឌុបគ្នាធ្វើសកម្មភាពឆក់ទូរសព្ទពីប្រជាពលរដ្ឋ ដោយមានកាំបិតបុង័តោនោះទុកសម្រាប់គំរាម ពេញចេញធ្វើសកម្មភាព ត្រូវបានសមត្ថកិច្ចធ្វើការចាប់ឃាត់ខ្លួន កាលពីវេលាម៉ោង៤និង៥០នាទីល្ងាច ថ្ងៃទី២៤ ខែកញ្ញា ឆ្នាំ២០២១ នៅលើផ្លូវលេខ១៣២ ក្នុងភូមិត្រពាំងស្វាយ ឃុំត្រធំខាងជើង ស្រុកត្រាំកក់ ខេត្តតាកែវ ។
សមត្ថកិច្ចបានឲ្យដឹងថា ជនសង្ស័យ០២នាក់ទី១ឈ្មោះ សាន្ត កុសល ភេទប្រុស អាយុ២៤ឆ្នាំ នៅភូមិសំរោង ឃុំត្រពាំងធំខាងត្បូង និងទី២ឈ្មោះ សៀង ខេ ភេទប្រុស អាយុ១៩ឆ្នាំ រស់នៅភូមិត្រពាំងថ្ម ឃុំសំរោង បានជិះម៉ូតូ០១គ្រឿង ធុនសេ១២៥ ស៊េរី២០១២ គ្មានស្លាកលេខ ប្រដាប់ដោយកាំបិតបុ័ងតោ បានធ្វើ សកម្មភាពឆក់យកទូរសព្វ័០១គ្រឿង របស់ជនរងគ្រោះឈ្មោះ ឈឿន សិលា ភេទស្រី អាយុ២៤ឆ្នាំ រស់នៅភូមិត្រពាំងស្វាយ ឃុំត្រពាំងធំខាងជើង នៅពេលជនរងគ្រោះជិះម៉ូតូត្រឡប់មកពីធ្វើការ។ ពេលធ្វើសកម្មភាពរួច ជនរងគ្រោះបានស្រែកថាចោរៗ ទើបផ្អើលដល់សមត្ថកិច្ច រួមជាមួយប្រជាពលរដ្ឋ បានដេញស្ទាក់ចាប់បានជនសង្ស័យចំនួន០២នាក់ នៅត្រង់ចំណុចភូមិពាក់បង្អោង ឃុំត្រពាំងធំខាងជើងតែម្តង។
ក្នុងនោះសមត្ថកិច្ចធ្វើការដកហូតបាន ម៉ូតូធុនសេ១២៥ស៊េរី២០១២ គ្មានស្លាកលេខ០១គ្រឿង,កាំបិតតាំងតោ០១,ទូរសព្ទមួយគ្រឿង ប្រគល់ជូនម្ចាស់ដើមវិញផងដែរ។
ដោយមានបទបញ្ជាពីឯកឧត្ដមស្នងការ និងដឹកនាំសម្របសម្រួលដោយឯកឧត្ដម ព្រះរាជអាជ្ញា សមត្ថកិច្ចបាននាំខ្លួនជនសង្ស័យនិងវត្ថុតាងមកកាន់អធិការដ្ឋាននគរបាលស្រុក ដើម្បីសាកសួរកសាងសំណុំរឿងតាមនីតិវិធីច្បាប់ ៕
