រាជធានីភ្នំពេញ ៖ យុវជនម្នាក់ បានរងរបួសធ្ងន់ ត្រូវបានបញ្ជូនទៅសង្គ្រោះបន្ទាន់នៅមន្ទីរពេទ្យ ខណៈកំពុងជិះម៉ូតូតាមដងផ្លូវ ស្រាប់តែត្រូវបានរថយន្តបែនដឹកខ្សាច់មួយគ្រឿង បើកមកពីក្រោយបុកពេញទំហឹង កាលពីវេលាម៉ោង ៧ព្រឹក ថ្ងៃទី២៦ ខែកញ្ញា ឆ្នាំ២០២១ នៅចំណុចតាមបណ្តោយផ្លូវបេតុងច្រកចូលបឹងតាម៉ាត សង្កាត់ដង្កោ ខណ្ឌដង្កោ រាជធានីភ្នំពេញ។

តាមប្រភពព័ត៌មានបានឲ្យដឹងថា មុនពេលកើតហេតុ គេឃើញ យុវជនម្នាក់ម៉ូតូ Zoomer-X ពណ៌ក្រហមលាយស ពាក់ស្លាកលេខ ភ្នំពេញ 1GM-8029 ធ្វើដំណើរពីកើតទៅលិច លុះដល់ចំណុចកើតហេតុ ក៏មានរថយន្តបែនដឹកខ្សាច់មួយគ្រឿង គ្មានស្លាកលេខ បើកបរស្របទិសដៅគ្នាក្នុងល្បឿនលឿន ជ្រុលមកបុកម៉ូតូដែលកំពុងជិះម៉ូតូនៅពីមុខ បណ្ដាលឲ្យយុវជនម្នាក់រងរបួសធ្ងន់ ត្រូវបានបញ្ជូនទៅសង្គ្រោះបន្ទាន់នៅមន្ទីរពេទ្យ ។

ភ្លាមនោះ អ្នកបើកបររថយន្តបែនដឹកខ្សាច់ បានប្រញាប់បើកទ្វាររថយន្តចុះគេចខ្លួន តែត្រូវបានអ្នកភូមិឃាត់ជាប់ ប្រគល់ឲ្យសមត្ថកិច្ច នាំយកទៅសាកសួរ និងវាស់វែង យកទាំងម៉ូតូទាំងរថយន្ត ទៅរក្សាទុក ដើម្បីដោះស្រាយគ្នាតាមច្បាប់បន្តទៀត ៕ មេសា