រាជធានីភ្នំពេញ ៖ ជនសង្ស័យម្នាក់ ត្រូវបានកម្លាំងល្បាតនៃអធិការដ្ឋាននគរបាលខណ្ឌឫស្សីកែវ ឃាត់ខ្លួន ក្រោយធ្វើសកម្មភាពលួចកង់ បានសម្រេច ហើយរត់គេចខ្លួនបានប្រហែលបានចម្ងាយប្រហែល៥០០ម៉ែត្រ វេលាម៉ោង៤និង៤៥នាទីល្ងាច ថ្ងៃទី២៧ ខែកញ្ញា ឆ្នាំ២០២១ នៅចំណុចផ្ទះលេខ៣២៦ ផ្លូវបេតុង ក្រុមទី៥ ភូមិបឹងសាឡាង សង្កាត់ឫស្សីកែវ ខណ្ឌឫស្សីកែវ រាជធានីភ្នំពេញ។
សមត្ថកិច្ចបានឲ្យដឹងថាជនរងគ្រោះឈ្មោះ ឡុង ពិសាខ ភេទប្រុស អាយុ៤២ឆ្នាំ មុខរបរបុគ្គលិកក្រុមហ៊ុន ស្នាក់នៅកន្លែងកើតហេតុ។ ចំណែកជនសង្ស័យឈ្មោះ អ៊ឹម សាន់ ភេទប្រុស អាយុ២១ឆ្នាំ មុខរបរគ្មាន មានទីលំនៅផ្លូវជាតិលេខ៥ ភូមិផ្សារតូច សង្កាត់ទួលសង្កែ១ ខណ្ឌឫស្សីកែវ រាជធានីភ្នំពេញ (ប្រើប្រាស់សារធាតុញៀន) ដកហូតបាន កង់មួយគ្រឿង ពណ៌ទឹកដោះគោ (ប្រគល់ជូនជនរងគ្រោះ)។
សូមបញ្ជាក់ថា ជនសង្ស័យរូបនេះ បានធ្វើសកម្មភាពឡើងរបងផ្ទះរបស់ជនរងគ្រោះលួចកង់មួយគ្រឿងបានសម្រេច រួចជិះគេចខ្លួន បានប្រហែល៥០០ម៉ែត្រ ក៏ជួបជាមួយកម្លាំងល្បាត សង្ស័យឃាត់សួរនាំ។ ជនសង្ស័យរូបនោះ ក៏បានឆ្លើយសារភាពថា កង់នេះបានលួចមក ភ្លាមៗនោះសមត្ថកិច្ចក៏ បាននាំខ្លួនជនសង្ស័យទៅចង្អុលកន្លែងកើតហេតុ និងទំនាក់ទំនងទៅជនរងគ្រោះមកដាក់ពាក្យបណ្តឹងនៅប៉ុស្តិ៍ឫស្សីកែវតែម្តង។
ពេលនោះ ជនសង្ស័យខាងលើ ត្រូវបានសមត្ថកិច្ចកសាងសំណុំរឿងបញ្ជូនទៅសាលាដំបូងរាជធានីភ្នំពេញចាត់ការតាមនីតិវិធីច្បាប់៕ អគ្គស្នងការដ្ឋាននគរបាលជាតិ
