រាជធានីភ្នំពេញ ៖ មេឃកំពុងមានការធ្លាក់ភ្លៀងខ្លាំង ស្រាប់តែមាន បុរសម្នាក់បើកបររថយន្តស៊េរីទំនើបម៉ាកឡិចស៊ីស៤៧០ ទៅបុករបាំងពុះចែកទ្រូងផ្លូវ ពេញទំហឹង បណ្តាលឲ្យខ្ទាតចេញពីគ្នាជាច្រើនម៉ែត្រ ខណៈរថយន្តវិញរងការខូចខាតផ្នែកខាងមុខ កាលពីយប់ឈានចូលថ្ងៃទី២៨ ខែកញ្ញា ឆ្នាំ២០២១ នៅចំណុចតាមបណ្ដោយផ្លូវ ២៨៩ ក្នុងសង្កាត់បឹងកក់ទី១ ខណ្ឌទួលគោក រាជធានីភ្នំពេញ។

ប្រភពព័ត៌មាននៅកន្លែងកើតហេតុបានឲ្យដឹងថា មុនពេលកើតហេតុគេបានឃើញ បុរសម្នាក់បើករថយន្តម៉ាកឡិចស៊ីស៤៧០ មួយគ្រឿង ដែលពាក់ស្លាកលេខ ភ្នំពេញ 2K-1773 សង្ស័យក្នុងល្បឿនលឿន ខណៈមេឃកំពុងធ្លាក់ភ្លៀងខ្លាំងផងនោះ ក៏បានរ៉េចង្កូតបុករបាំងថ្មពុះចែកទ្រូងផ្លូវ បណ្ដាលឲ្យរងការខូចខាតយ៉ាងដំណំ។ ចំណែកឯអ្នកបើករថយន្តវិញពុំមានអ្នកណារងរបួសឡើយ ។

ក្រោយកើតហេតុ សមត្ថកិច្ចមូលដ្ឋានបានទាក់ទងទៅសមត្ថកិច្ចជំនាញចរាចរណ៍ របស់ស្នងការនគរបាលរាជធានីភ្នំពេញ ដើម្បីចុះមកធ្វើការវាស់វែង និងស្ទូចរថយន្តយកទៅរក្សាទុកនៅស្នងការដ្ឋាននគរបាលរាជធានីភ្នំពេញ រង់ចាំម្ចាស់ចូលមកដោះស្រាយទៅតាមផ្លូវច្បាប់ បន្តទៀត ៕ Mrr Ka