រាជធានីភ្នំពេញ ៖ នារីស្រស់ស្អាត២នាក់ ត្រូវបានជនសង្ស័យធ្វើសកម្មភាពឆក់ទូរស័ព្ទ Iphone 11 pro mex បណ្ដាលឲ្យក្រឡាប់កង់បីរបួសនារីរងគ្រោះ ត្រូវបានបញ្ជូនទៅសង្គ្រោះនៅមន្ទីរពេទ្យ ត្រូវបានសមត្ថកិច្ចកំពុងល្បាតបានឃើញក៏ចាប់ខ្លួនបាន២នាក់ យកមកសាកសួរភ្លាមៗ កាលពីវេលាម៉ោង ១០យប់ ថ្ងៃទី២៧ ខែកញ្ញា ឆ្នាំ២០២១ នៅចំណុចផ្លូវ២១៤ ក្នុងសង្កាត់បឹងរាំង ខណ្ឌដូនពេញ រាជធានីភ្នំពេញ។

ប្រភពព័ត៌មាន ពីជនរងគ្រោះបានឲ្យដឹងថា មុនពេលកើតហេតុ នារីស្រស់ស្អាត២នាក់ បានចេញពីផ្ទះបបួលគ្នាទៅញ៉ាំអី ដោយបាននាំគ្នា ជិះកង់បីឥណ្ឌាមួយគ្រឿង ធ្វើដំណើរតាមបណ្ដោយផ្លូវ២១៤ ក្នុងសង្កាត់បឹងរាំង ខណ្ឌដូនពេញ ស្រាប់តែមានជនសង្ស័យមួយក្រុម ជិះម៉ូតូម៉ាកហុងដាសេ១២៥ និងម៉ូតូម៉ាកស៊ុយសាគីនិច ១គ្រឿង បានជិះមកអែបក្បែរ រួចលូកដៃធ្វើសកម្មភាពឆក់ទូរស័ព្ទ Iphone 11 pro mex ពីនារីរងគ្រោះ បានសម្រេច បណ្តាលឲ្យក្រឡាប់កង់បីឥណ្ឌា ដួលនារី២នាក់រងរបួស ត្រូវបានបញ្ជូនតាមរថយន្តសាមុយទៅសង្គ្រោះនៅមន្ទីរពេទ្យ។ ភ្លាមនោះ សមត្ថកិច្ចកំពុងល្បាតបានឃើញទាន់ ចាប់ខ្លួនបានជនសង្ស័យ២នាក់ ដែលជិះម៉ូតូម៉ាកនិច មួយគ្រឿង ពាក់ស្លាកលេខ ភ្នំពេញ 1IN-8491 យកមកសាកសួរភ្លាមៗ ។

លោកអធិការខណ្ឌដូនពេញ បានបញ្ជាក់ប្រាប់TVFB នៅព្រឹកថ្ងៃទី២៨ ខែកញ្ញា ឆ្នាំ២០២១នេះថា ចំពោះករណីនេះ សមត្ថកិច្ចបានធ្វើការចាប់បានជនសង្ស័យ២នាក់ហើយ កំពុងធ្វើការសាកសួរ និងកំពុងបន្តចាប់បក្ខពួកដែលនៅសេសសល់ថែមទៀត ។

បន្ទាប់ពីកើតហេតុហើយនោះ ជនរងគ្រោះក៏បានមកដាក់ពាក្យបណ្ដឹងនៅប៉ុស្តិ៍នគរបាលបឹងរាំង ដើម្បីឲ្យសមត្ថកិច្ច ចាត់ការទៅលើជនសង្ស័យទាំងនោះ ទៅតាមនិតិវិធីច្បាប់ និងស្រាវជ្រាវតាមចាប់បក្ខពួកបន្ថែមទៀត ៕Mrr Ka