រាជធានីភ្នំពេញ៖ បុរសម្នាក់ បានរងរបួសធ្ងន់ ខណៈកំពុងបើកបររម៉កតាមដងផ្លូវ ក៏ជួបគ្រោះថ្នាក់ចរាចរណ៍រវាង រថយន្ត Lexus RX300 ដែលបើកបរដោយបុរសម្នាក់ សង្ស័យក្នុងល្បឿនលឿន បុកគ្នាចំពីមុខរម៉កដែលជិះបញ្ច្រាស់ទិសគ្នាពេញទំហឹង តែម្តង កាលពីវេលាម៉ោង៦និង៥៥នាទីព្រឹក ថ្ងៃទី២៨ ខែកញ្ញា ឆ្នាំ២០២១ នៅតាមបណ្តោយផ្លូវ៦០ម៉ែត្រ ក្នុងសង្កាត់ជើងឯក ខណ្ឌដង្កោ រាជធានីភ្នំពេញ។

ប្រភពព័ត៌មានពីពលរដ្ឋនៅកន្លែងកើតហេតុ បានឲ្យដឹងថា មុនកើតហេតុ គេបានឃើញបុរសម្នាក់ បើកម៉ូតូសណ្តោងរម៉កដឹកទឹកកកមួយគ្រឿង គ្មានស្លាកលេខ ធ្វើដំណើរតាមបណ្តោយផ្លូវ៦០ម៉ែត្រ ពីត្បូងមកជើងក្នុងល្បឿនលឿន ដល់ចំណុចកើតហេតុក៏មានរថយន្តLexus RX300 មួយគ្រឿង ពណ៌ស្ករ ពាក់ផ្លាកលេខ តាកែវ 2C-2015 បើកបរតាមបណ្តោយផ្លូវ៦០ម៉ែត្រ ពីជើងមកត្បូងសង្ស័យក្នុងល្បឿនលឿនបានចូលមកគន្លងផ្លូវម្ខាងទៀត បុកម៉ូតូសណ្តោងរ៉ឺម៉កដឹកទឹកកក ពេញទំហឹង បណ្តាលឲ្យរម៉កខ្ទេចទាំងស្រុង រថយន្តក៏រងការខូចខាត។ ចំណែកឯអ្នកបើកបររថយន្តវិញ ត្រូវបានសមត្ថកិច្ចឃាត់ខ្លូនបានផងដែរ។

ក្រោយកើតហេតុសមត្ថកិច្ចមូលដ្ឋាន សហការជាមួយនឹងផ្នែកជំនាញចរាចរណ៍ ចុះមកដល់រួចបានវាស់វែងយករថយន្តនិងរម៉កទៅរក្សាទុកនៅ អធិការដ្ឋាននគរបាលខណ្ឌដង្កោ រង់ចាំដោះស្រាយនៅពេលក្រោយ៕មេសា