រាជធានីភ្នំពេញ ៖ ជនសង្ស័យម្នាក់ ជិះម៉ូតូធ្វើសកម្មភាពឆក់ទូរស័ព្ទដៃនារីម្នាក់កំពុងជិះម៉ូតូបានសម្រេច ស៊យធំត្រូវបាននារីរងគ្រោះ ជិះដេញតាមស្រែកឆោឡោ ផ្អើលសមត្ថកិច្ចដេញចាប់ខ្លួនបាន កាលពីវេលាម៉ោង ៧ព្រឹក ថ្ងៃទី២៨ ខែកញ្ញា ឆ្នាំ២០២១ នៅចំណុចមុខវត្តវាលស្បូវ ផ្លូវជាតិលេខ១ ភូមិស្វាយតាអុក១ សង្កាត់វាលស្បូវ ខណ្ឌច្បារអំពៅ រាជធានីភ្នំពេញ ។

សមត្ថកិច្ចបានឲ្យដឹងថា ជនសង្ស័យមានឈ្មោះ អុន ពេជ្រ ភេទប្រុស អាយុ២៩ឆ្នាំ មុខរបរ សន្តិសុខឯកជន ស្នាក់នៅភូមិមិត្តភាព១ សង្កាត់ព្រែកឯង ខណ្ឌច្បារអំពៅ។

បើតាមប្រភពព័ត៌មានពីសមត្ថកិច្ចបានឲ្យដឹងថា មុនពេលកើតហេតុ ជនរងគ្រោះជិះម៉ូតូមួយគ្រឿងម៉ាក Suzuki Lets ពណ៌ស ទុកទូរស័ព្ទដៃម៉ាក iPhone11 Pro Max ក្នុងឃ្លុបម៉ូតូក្រោមដៃចង្កូត ស្រាប់តែជនសង្ស័យជិះម៉ូតូម៉ាកស៊ុយសាគីស្មាស់ ពណ៌ខ្មៅ ពាក់ផ្លាកលេខ ភ្នំពេញ 1AZ-5025 មកពីក្រោយអែបស្តាំដៃ រួចក៏ឆក់ទូរស័ព្ទដៃរបស់ជនរងគ្រោះបានសម្រេចជិះគេចខ្លួន តែត្រូវជនរងគ្រោះជិះតាមពីក្រោយស្រែកចោរៗ ដល់ផ្លូវជាតិលេខ១ ក្នុងភូមិបឹងឈូក សង្កាត់និរោធ ក៏ត្រូវបានប្រជាពលរដ្ឋ សន្តិសុខ និងសមត្ថកិច្ចកំពុងល្បាតជួយឃាត់បាន។

ពេលនោះនារីរងគ្រោះក៏បានយកទូរសព្ទរបស់ខ្លួនវិញ ហើយជិះចេញទៅបាត់ ខណៈជនសង្ស័យត្រូវបានសមត្ថកិច្ចនាំមកកាន់ ប៉ុស្តិ៍ដើម្បីធ្វើការសាកសួរ និងចាត់ការតាមនីតិវិធីច្បាប់បន្តទៀត៕ មេសា