រាជធានីភ្នំពេញ ៖ បុរសម្នាក់ ដែលជាជាងភ្លើង បានស្លាប់យ៉ាងរន្ធត់ ខណៈឡើងតភ្លើង បែរជាឆ្លងចរន្តអគ្គិសនីឆក់ស្លាប់ ក្រោយបញ្ជូនដល់មន្ទីរពេទ្យ ទុកឲ្យប្រពន្ធនិងសាច់ញាតិ យំបោកខ្លួនយ៉ាងខ្លាំងទាំងមិនអាចទទួលយកបាន កាលពីវេលាម៉ោង ៧និង៤០នាទីយប់ ថ្ងៃទី២៨ ខែកញ្ញា ឆ្នាំ២០២១ ក្នុងភូមិខ្វា សង្កាត់ដង្កោ ខណ្ឌដង្កោ រាជធានីភ្នំពេញ។
បើតាមប្រភពព័ត៌មានពីបងប្រុសរបស់ជនរងគ្រោះ ដែលស្លាប់បានឲ្យដឹងថា សពជនរងគ្រោះមានឈ្មោះ ហ៊ន វិបុល ភេទប្រុស អាយុ២៤ ឆ្នាំ មុខរបរជាងភ្លើង មានស្រុកកំណើត នៅខេត្តតាកែវ ហើយមុនពេលកើតហេតុ គាត់បានចូលទៅតភ្លើងនៅក្នុងបន្ទប់ជាន់ខាងក្រោម កន្លែងការងារ ។ ចំណែកជនរងគ្រោះជាប្អូន ឡើងទៅជាន់ខាងលើដើម្បីតភ្លើង ខណៈកំពុងរៀបយកខ្សែភ្លើងមកត ស្រាប់តែឆ្លងចរន្តអគ្គិសនី ឆក់ប្អូនរបស់គាត់ដួលនៅនឹងកន្លែង ទើបគាត់ស្រវ៉េស្រវ៉ាជួយប្អូន និងប្រញាប់ហៅរថយន្តសាមុយ មកដឹកយកទៅសង្រ្គោះបន្ទាន់ នៅមន្ទីរពេទ្យបង្អែកខណ្ឌដង្កោ តែធ្ងន់ធ្ងរពេកប្អូនគាត់ក៏ដាច់ខ្យល់ស្លាប់ទៅហើយ ក៏រាយការណ៍ជូនសមត្ថកិច្ចតែម្តង ។
ក្រោយកើតហេតុ សមត្ថកិច្ចនគរបាលប៉ុស្តិ៍ដង្កោ សហការជាមួយនគរបាលជំនាញផ្នែកកោសល្យវិច័យខណ្ឌ បានចុះមកធ្វើការពិនិត្យសាកសព បានឲ្យដឹងថា ជនរងគ្រោះពិតជាស្លា.ប់ ដោយសារឆក់ខ្សែភ្លើងពិតមែន និងប្រគល់ឲ្យប្រពន្ធយកទៅធ្វើបុណ្យនៅស្រុកកំណើត ៕ មេសា
