រាជធានីភ្នំពេញ ៖ រថយន្តឃ្លុបដឹកក្រដាសឡាំងមួយគ្រឿង សង្ស័យបើកបរក្នុងល្បឿនលឿន គេចពីរថយន្តកុងតឺន័រមួយគ្រឿងទៀត ធ្លាក់ផ្លូវក្រឡាប់ចូលប្រឡាយទឹក បះជើងច្រង៉ាង កាលពីវេលាម៉ោង ១០និង២៥នាទីព្រឹក ថ្ងៃទី២៩ ខែកញ្ញា ឆ្នាំ២០២១ ចំណុចមុខផែទូកុងតឺន័រមួយកន្លែង តាមបណ្តោយផ្លូវជាតិលេខ៣ ក្នុងភូមិស្រែញ សង្កាត់ពងទឹក ខណ្ឌដង្កោ រាជធានីភ្នំពេញ ។

ប្រភពព័ត៌មានពីបងប្អូនប្រជាពលរដ្ឋបានឲ្យដឹងថា មុនពេលកើតហេតុ គេបានឃើញរថយន្តម៉ាក HINO ប្រភេទឃ្លុបដឹកក្រដាសឡាំងមួយគ្រឿង ពណ៌ស ពាក់ស្លាកលេខ កណ្ដាល 3A- 28 33 បើកបរដោយបុរសម្នាក់លើផ្លូវជាតិលេខ៣ ពីត្បូងទៅជើង សង្ស័យក្នុងល្បឿនលឿន បានគេចពីរថយន្តកុងតឺន័រ កំពុងឆ្លងផ្លូវ ក៏រេចង្កូតធ្លាក់ផ្លូវបណ្ដាលឲ្យក្រឡាប់ផ្ងារជើងចូលប្រឡាយទឹកតែម្តង តែគ្មាននរណាម្នាក់ រងរបួសនោះទេ។

ក្រោយកើតហេតុ ដោយសាររថយន្តខាងលើ ក្រឡាប់ខ្លួនឯង មិនប៉ះពាល់ដល់ទ្រព្យសម្បត្តិរដ្ឋ និងឯកជនផ្សេងទៀត សមត្ថកិច្ចក៏អនុញ្ញាតឲ្យភាគីរថយន្តនោះ ស្ទូចរថយន្តនេះយកទៅជួសជុលដោយខ្លួនឯង ៕ មេសា