ខេត្តព្រះសីហនុ ៖ រថយន្តធុនធំដឹកដីមួយគ្រឿង សង្ស័យដាច់ហ្វ្រាំង បានជ្រុលចង្កូតទៅបុកជាមួយនឹងម៉ូតូចំនួន០២គ្រឿង រួចក្រឡាប់ផ្ងារជើងចាក់ដីពេញផ្លូវ បណ្ដាលឲ្យមនុស្សចំនួន២នាក់ រងរបួសធ្ងន់ស្រាល កាលពីវេលាម៉ោង ២និង៤០នាទី រសៀលថ្ងៃទី២៩ ខែកញ្ញា ឆ្នាំ២០២១ នៅតាមបណ្ដោយផ្លូវវិថីផែ ទល់មុខជាមួយនឹងច្រកចូលកំពង់ផែស្វយ័តខេត្តព្រះសីហនុ ក្នុងភូមិ០៣ សង្កាត់លេខ០៣ ក្រុងព្រះសីហនុ ខេត្តព្រះសីហនុ។

ប្រភពពីសមត្ថកិច្ច បានប្រាប់មកកាន់អង្គភាព TVFB ឲ្យបានដឹងថា មុនពេលកើតហេតុរថយន្តម៉ាកហ៊ីយ៉ាន់ដាយមួយគ្រឿង ពាក់ស្លាកលេខ ព្រះសីហនុ 3A-8518 បើកបរដោយឈ្មោះ អាត ម៉ារ៉ាឌី ភេទ ប្រុស អាយុ ២៩ឆ្នាំ មុខរបរអ្នកបើកឡាន ស្នាក់នៅភូមិ ០១ សង្កាត់ ០១ ក្រុង/ខេត្តព្រះសីហនុ និងអ្នករួមដំណើរម្នាក់មិនស្គាល់ឈ្មោះ បើកបរទិសដៅពីជើងមកត្បូង ចុះពីចំណោតយាយម៉ៅកាត់តាមផ្លូវរ៉ាសំដៅមកកំពង់ផែស្វយ័តខេត្តព្រះសីហនុ ខណៈមកដល់កន្លែងកើតហេតុ រថយន្តខាងលើបានដាច់ហ្រ្វាំង ជ្រុលចង្កូតទៅបុកជាមួយនឹងថ្មពុះចែកទ្រូងផ្លូវរួចក៏ទៅបុកជាមួយម៉ូតូមួយគ្រឿងម៉ាក Honda Dream ឆ្នាំ២០១២ ពាក់ស្លាកលេខ ភ្នំពេញ 1BD-2598 ខ្ទាតមនុស្សនៅកណ្ដាលផ្លូវរងរបួសជើងស្ដាំតិចតួច ហើយបានជ្រុលចង្កូតទៅមួយទំហឹងតែម្ដង មកបុកជាមួយម៉ូតូ Honda Dream ឆ្នាំ២០២០ មួយគ្រឿង ចូលក្នុងសួនច្បារខាងមុខកំពុងផែស្វយ័តខេត្តព្រះសីហនុ បណ្ដាលឲ្យរងរបួសជើងខាងឆ្វេងយ៉ាងធ្ងន់ធ្ងរ ភ្លាមៗនោះរថយន្តសង្គ្រោះបន្ទាន់ បាននាំយកជនរងគ្រោះទៅមន្ទីរពេទ្យបាត់ទៅ ។ រីឯរថយន្តបង្ក បានក្រឡាប់ផ្ងារជើង បានធ្លាក់ចូលក្នុងជង្ហុកប្រឡាយហូរទឹក បាក់កង់ខាងមុខលែងរួចច្រង៉ាង ចាក់ដីប្រឡាក់ពេញផ្លូវតែម្តង ។

ក្រោយកើតហេតុសមត្ថកិច្ចនគរបាលចរាចរណ៍ផ្លូវគោក បានធ្វើការវាស់វែង ព្រមទាំងលើកយកវត្ថុតាងទាំងសងខាងទៅរក្សាទុកនៅការិយាល័យចរាចរណ៍ រង់ចាំការដោះស្រាយតាមនីតិវិធីច្បាប់បន្តទៀត៕