ខេត្តកំពង់ស្ពឺ ៖ យោងតាមផេក អគ្គស្នងការដ្ឋាននគរបាលជាតិ បានឲ្យដឹងថា មានករណីអគ្គិភ័យ មួយបានកើតឡើងនៅក្នុងរោងចក្រដំណាប់ស្វាយមូតាយ៉ាងសន្ធោសន្ធៅ ផ្អើលសមត្ថកិច្ចចុះមកអន្តរាគមន៍បាញ់ពន្លត់ កាលពីវេលាម៉ោង ២និង៥នាទី រសៀល ថ្ងៃទី២៩ ខែកញ្ញា ឆ្នាំ២០២១នៅភូមិទី១ ឃុំត្រែងត្រយឹង ស្រុកភ្នំស្រួច ខេត្តកំពង់ស្ពឺ។
សមត្ថកិច្ចបានឲ្យដឹងថា ក្នុងហេតុការណ៍នេះ បានឆេះអគារ១ខ្នងទំហំ១៩គុណ៦០ម៉ែត្រ ធ្វើអំពីដែកប្រក់ស័ង្កសី ប្រហែល៦០ភាគរយ និងឆេះកញ្ច្រែងជ័រដាក់ស្វាយជាង២០០០កញ្ច្រែង ដែលសមត្ថកិច្ចបញ្ជាក់ថា បណ្តាលមកពីជាងផ្សារដំបូលធ្លាក់កម្ទេចធូបលើកញ្ច្រែងជ័រដាក់ស្វាយ។
ក្នុងនោះ កម្លាំងការិយាល័យនគរបាលបង្ការ ពន្លត់អគ្គិភ័យ និងសង្គ្រោះ កម្លាំងអធិការដ្ឋាននគរបាលស្រុកភ្នំស្រួច និងកម្លាំងសាលាមិត្តភាពកម្ពុជា វៀតណាម បានចេញប្រតិបត្តិការ ជួយអន្តរាគមន៍ ដោយប្រើប្រាស់រថយន្តពន្លត់អគ្គិភ័យចំនួន៥គ្រឿង ប្រើទឹកអស់៥ឡាន ទើបគ្រប់គ្រងស្ថានការណ៍បានទាំងស្រុង ៕
