រាជធានីភ្នំពេញ ៖ ជនសង្ស័យម្នាក់ ត្រូវបានកម្លាំងនគរបាលប៉ុស្តិ៍រដ្ឋបាលសង្កាត់វាលវង់ ធ្វើការចាប់ឃាត់ខ្លួន យកទៅសាកសួរ បន្ទាប់ពីធ្វើសកម្មភាព ប៉ុនប៉ងគាស់ផ្ទះប្រជាពលរដ្ឋ ដែលម្ចាស់គេបានចាក់សោរទុកចោល កាលពីវេលាម៉ោង៩ និង៣៥នាទីព្រឹក ថ្ងៃទី៣០ ខែកញ្ញា ឆ្នាំ២០២១ នៅចំណុចដីឡូគ្មានលេខ ផ្លូវលេខ១៦៩ សង្កាត់ វាលវង់ ខណ្ឌដូនពេញ រាជធានីភ្នំពេញ។
ប្រភពព័ត៌មានពីជាងសំណង់ម្នាក់ បានឲ្យដឹងផ្ទះ ដែលជនសង្ស័យ ធ្វើសកម្មភាពប៉ុនប៉ងគាស់ចូលលួចទ្រព្យសម្បត្តិនេះ ម្ចាស់ផ្ទះបានចាក់សោរទ្វារទុកចោលយូរមកមើល ក្នុងនោះកាលពី៣ថ្ងៃមុន ម្ចាស់ផ្ទះក៏បានមកចាក់សោរផ្ទះចូលមើល ស្រាប់តែឃើញឥដ្ឋព្រិលខ្យល់ជញ្ជាំង មានស្នាមមានមនុស្សគាស់បាក់ចូលលួចកាត់ខ្សែរភ្លើងនៅក្នុងផ្ទះរបស់គាត់អស់ លុះនៅព្រឹកថ្ងៃទី៣០ ខែកញ្ញា ឆ្នាំ២០២១ ម្ចាស់ផ្ទះបានឲ្យរូបគាត់ជាជាង មកចាក់សោរទ្វារផ្ទះ ដើម្បីរាបឥដ្ឋព្រិលខ្យល់អោយជិតធម្មតាវិញ កុំអោយមានមនុស្សចូលរួច ខណៈគាត់ចាក់សោរទ្វារចូលដល់ក្នុងផ្ទះ ស្រាប់តែមានជនសង្ស័យម្នាក់ ចូលគាស់ពិដានហើយកំពុងសម្ងំលើពិដានផ្ទះ ប៉ុនប៉ងលួចទ្រព្យសម្បត្តិ ស្រាប់តែលោកចុះមកក្រោម ហើយរត់ចូលដីឡូទុកចោលក្បែរកន្លែងកើតហេតុ ទើបគាត់ស្រែកឆោឡោថាចោរៗ បង្កឲ្យមានការភ្ញាក់ផ្អើល ដល់សមត្ថកិច្ចចុះមកកន្លែងកើតហេតុ ធ្វើការឃាត់ខ្លួនបានភ្លាមៗ យកទៅសាកសួរបន្តនៅប៉ុស្តិ៍នគរបានរដ្ឋបាលវាលវង់តែម្តង។
ក្រោយមកដោយសារតែម្ចាស់ផ្ទះ មិនបានមកដាក់ពាក្យប្តឹង ទើបសមត្ថកិច្ចក៏សម្រេច ធ្វើការអប់រំបុរសខាងលើ រួចអនុញ្ញាតឲ្យត្រឡប់ទៅផ្ទះវិញ៕ នង មឿន
