រាជធានីភ្នំពេញ ៖ រថយន្ត២គ្រឿង ក្នុងនោះមានមួយគ្រឿងម៉ាកអូឌី និងមួយទៀតម៉ាក កាមរីបាឡែន បានបុកគ្នាយ៉ាងពេញទំហឹង បណ្ដាលឲ្យរថយន្តទាំង២គ្រឿងនោះ រងការខូចខាតស្ទើរទាំងស្រុង ដោយរថយន្តកាមរីបាឡែននោះ បានរេចង្កូតឡើងលើសួនច្បារ ពុះចែកទ្រូងផ្លូវបន្ថែមគាំងជាប់ទៅមុខលែងរួច បង្កការភ្ញាក់ផ្អើលនៅម៉ោង ៤និង៥០នាទីល្ងាច ថ្ងៃទី៣០ ខែកញ្ញា ឆ្នាំ២០២១ នៅតាមបណ្ដោយផ្លូវជាតិលេខ ៦អា ក្នុងសង្កាត់ជ្រោយចង្វារ ខណ្ឌជ្រោយចង្វារ រាជធានីភ្នំពេញ។

ប្រភពព័ត៌មានពីកន្លែងកើតហេតុ បានឲ្យដឹងថា មុនពេលកើតហេតុ គេបានឃើញរថយន្តស៊េរីទំនើបម៉ាក អូឌី (Audi A7) ពណ៌ខ្មៅ ពាក់ស្លាកលេខ ភ្នំពេញ 2AO-2221 ធ្វើដំណើរចេញពីច្រកចូលបុរីមួយកន្លែង ពីកើតទៅលិចមកផ្លូវជាតិលេខ៦អាបំណងឆ្លងផ្លូវ ។ ចំណែករថយន្តម៉ាកកាមរីបាឡែន ពណ៌ទឹកប្រាក់ ពាក់ស្លាកលេខ ភ្នំពេញ 2AB-2959 ធ្វើដំណើរតាមបណ្ដោយផ្លូវជាតិលេខ៦អា ពីត្បូងទៅជើង ។ ខណៈនោះរថយន្តអូឌីបានបើកគេចពីរម៉កកង់បីមួយគ្រឿង ក៏បានជ្រុលទៅបុកគ្នាយ៉ាងពេញទំហឹង ជាមួយរថយន្តបាឡែន បណ្ដាលឲ្យរថយន្តទាំង២គ្រឿងនោះ រងការខូចខាតទាំងសងខាង ផ្នែកខាងមុខ ។ ដោយសារមិនទាន់អស់ល្បឿន រថយន្តកាមរីបាឡែននោះ ក៏បានរេចង្កូតឡើងសួនច្បារពុះចែកទ្រូងផ្លូវទៅមុខលែងរួចតែម្តង តែសំណាងល្អមិនបណ្ដាលឲ្យមនុស្សណាម្នាក់រងរបួសឡើយ។

ក្រោយកើតហេតុ សមត្ថកិច្ចផ្នែកចរាចរណ៍បានចុះមកដល់កន្លែងកើតហេតុ ធ្វើការពិនិត្យនិងវាស់វែង ដោយទុកឲ្យភាគីទាំង២ ធ្វើការសម្របសម្រួលគ្នា តែដោយសារមិនត្រូវរ៉ូវគ្នា ក៏ប្រគល់ឲ្យសមត្ថកិច្ចជំនាញចរាចរណ៍វាស់វែង យករថយន្តទាំង២គ្រឿងទៅរក្សាទុក នៅការិយាល័យចរាចរណ៍ផ្លូវគោក នៃស្នងការដ្ឋាននគរបាលរាជធានីភ្នំពេញ ដើម្បីដោះស្រាយគ្នាពេលក្រោយតាមច្បាប់បន្តទៀត ៕ នង មឿន