រាជធានីភ្នំពេញ ៖ យុវជនម្នាក់ បានស្លាប់យ៉ាងអាណោចអាធ័ម ពេលបញ្ជូនទៅមន្ទីរពេទ្យ ដោយសារតែរងរបួសធ្ងន់ធ្ងរខ្លាំងពេក ក្រោយជិះម៉ូតូឆ្លងផ្លូវ ហើយត្រូវបាន រថយន្តមិនចាំម៉ាកមួយគ្រឿង បើកបរក្នុងល្បឿនលឿនមកបុកពេញទំហឹង អូសជាច្រើនម៉ែត្រ ទៅផ្ទប់នឹងដើមត្របែកព្រៃ កាលពីវេលាម៉ោងជាង១១យប់ ថ្ងៃទី៣០ ខែកញ្ញា ឆ្នាំ២០២១ នៅចំណុចផ្លូវ២៨៩ កែងផ្លូវ៥២៨ សង្កាត់បឹងកក់ទី១ ខណ្ឌទួលគោក រាជធានីភ្នំពេញ ។

សមត្ថកិច្ចបានឲ្យដឹងថា សពជនរងគ្រោះដែលស្លាប់នេះ មានឈ្មោះ វ៉ាន់ដេត ឡូយ ភេទប្រុស អាយុ ១៧ឆ្នាំ មានស្រុកកំណើត នៅឃុំជីផុត ស្រុកមេសាង ខេត្តព្រែវែង។

ប្រភពព័ត៌មានពីប្រជាពលរដ្ឋនៅកន្លែងកើតហេតុ ដែលបានឃើញហេតុការណ៍បានឲ្យដឹងថា មុនពេលកើតហេតុ គេបានឃើញ ម៉ូតូមួយគ្រឿង ម៉ាកហុងដាសេ១២៥ ពណ៌ខ្មៅ ពាក់ស្លាកលេខ ភ្នំពេញ 1IW-7420 ជិះដោយយុវជនម្នាក់តាមបណ្តផយផ្លូវ២៨៩ ពីត្បូងទៅជើងឆ្លងផ្លូវ ត្រូវបានរថយន្តស៊េរីទំនើប មិនចាំម៉ាកមួយគ្រឿង កំពុងបើកបរក្នុងល្បឿនលឿន បុកម៉ូតូពេញទំហឹង លាន់ដូចរន្ទះ ផ្លោងជាច្រើនម៉ែត្រ រួចបន្តល្បឿនបើករត់បាត់ស្រមោល ខណៈយុវជនអ្នកជិះម៉ូតូវិញ គឺរងរបួសធ្ងន់ធ្ងរ ត្រូវបានបញ្ជូនទៅសង្គ្រោះបន្ទាន់នៅមន្ទីរពេទ្យ តែអកុលសបែរជាស្លាប់យ៉ាងអាណោចអាធ័ម ពេលបញ្ជូនទៅមន្ទីរពេទ្យ។

ក្រោយកើតហេតុ សមត្ថកិច្ចជំនាញចរាចរណ៍បានចុះមកធ្វើការពិនិត្យធ្វើកំណត់ហេតុវាស់វែង និងយកម៉ូតូជនរងគ្រោះទៅរក្សាទុក ដើម្បីស្រាវជ្រាវតាមរករថយន្តបង្កនោះចូលខ្លួនមកដោះស្រាយគ្នាតាមច្បាប់ និងប្រគល់សាកសពជនរងគ្រោះ ឲ្យសាច់ញាតិធ្វើបុណ្យតាមប្រពៃណី ៕ ពេជ្រ