រាជធានីភ្នំពេញ ៖ មានការភ្ញាក់ផ្អើល ទាំងកណ្តាលថ្ងៃត្រង់ នៅចំណុចផ្លូវ២៧១ ខណៈបងប្អូនប្រជាពលរដ្ឋមួយចំនួន បានបង្ខំចិត្តឈប់ម៉ូតូនិងរថយន្តនៅលើដងផ្លូវ ស្របពេលដែលមានបុរសម្នាក់បានរត់ឡើងលើរថយន្តស្ទូចរបស់ប្រជាពលរដ្ឋ រួចកាន់ដំបង និងដែកសម្រាប់ស្ទូច គ្រវី ក្រវាត់ រកគប់និងវាយអ្នកដំណើរតាមដងផ្លូវ កាលពីវេលាម៉ោង ១រសៀល ថ្ងៃទី១ ខែតុលា ឆ្នាំ២០២១នេះ នៅចំណុចក្នុងភូមិសាស្ត្រ សង្កាត់បឹងទំពុន១ ខណ្ឌមានជ័យ រាជធានីភ្នំពេញ ។

ប្រភពព័ត៌មានពីប្រជាពលរដ្ឋបានឲ្យដឹងថា គាត់ បានឃើញបុរសម្នាក់ ដើរស្លៀកខោ ដោះអាវ ដោយនៅលើខ្លួនមានស្នាមសាក់ រូបនាគនៅជាប់ខ្នង មិនដឹងជាកើតអ្វី បានដើរតាមដងផ្លូវ២៧១ មកដល់ចំណុចកើតហេតុ ក៏ស្ទុះរត់ឡើងលើរថយន្តស្ទូច របស់ប្រជាពលរដ្ឋដែលចតនៅចិញ្ចើមផ្លូវ ឡើងមកលើរថយន្តខាងក្រោយ រួចកាន់ដំបងឈើជ្រុង និងដែកសម្រាប់ឆ្ពក់ស្ទូច ជាប់ដៃទាំងសងខាង គ្រវីក្រវាត់ ជ្រលដាក់ប្រជាពលរដ្ឋដែលជាអ្នកធ្វើដំណើរតាមដងផ្លូវមានការភ័យខ្លាច ខ្លះបានបង្ខំចិត្តឈប់រថយន្ត ឈប់ម៉ូតូសិន មិនហ៊ានបន្តដំណើរទៅមុខ ខ្លាចបុរសរូបនោះ វាយនិងគប់ត្រូវ ដែលជាហេតុបង្កការភ័យខ្លាចដល់ប្រជាពលរដ្ឋមួយសំបក់ធំ ។

ក្រោយមកគេក៏ឃើញមានវត្តមាន មន្ត្រីសាលាសង្កាត់បឹងទំពុន១ រួមទាំងសមត្ថកិច្ចបានប្រើគ្រប់វិធីសាស្ត្រ ដើម្បីចាប់ឃាត់បុរសខាងលើនេះ ឲ្យចុះមកខាងក្រោមវិញ ទម្រាំនឹងចាប់ឃាត់ខ្លួនប្រើពេលជាយូរ ដោយសមត្ថកិច្ចបានបង្ខំចិត្តបាញ់បំពង់ពន្លត់អគ្គិភ័យ ទៅលើបុរសរូបនោះ រួចសង្គ្រប់ ចូលចាប់ឃាត់បានតែម្តង នាំចុះពីលើរថយន្ត ត្រូវបានបងប្អូនប្រជាពលរដ្ឋ ផ្ទុះកំហឹង វាយម្នាក់មួយដៃមួយជើង បណ្តាលឲ្យបុរសដែលចេញក្បាច់គុនលើរថយន្តតែឯងនោះ សន្លប់ស្តូកស្តឹងតែម្តង ។

ក្នុងនោះ បើតាមការបញ្ជាក់របស់សមត្ថកិច្ច ប្រាប់មកកាន់ក្រុមការងារTVFB នៅកន្លែងកើតហេតុ បានឲ្យដឹងថា បុរសខាងលើនេះ គឺនិយាយភាសាចិន ហើយការដែលគាត់ទៅជាបែបនេះ គឺសង្ស័យថាបានប្រើប្រាស់ថ្នាំញៀនលើសកម្រិត ប៉ុន្តែទោះបីជាយ៉ាងណា សមត្ថកិច្ចបានលើកបុរសរូបនោះ ដាក់លើរម៉ក ដឹកយកទៅកាន់ប៉ុស្តិ៍បឹងទំពុនទី១ ដើម្បីធ្វើតេស្តទឹកនោម និងសាកសួរបន្តទៀត ហើយចំពោះហេតុការណ៍នេះគ្មាននរណាម្នាក់ រងរបួសអ្វីនោះឡើយ ៕ មេសា