ខេត្តកំពង់ចាម ៖ យោងតាមផេក បញ្ជាការដ្ឋាន កងរាជអាវុធហត្ថខេត្តកំពង់ចាម បានឲ្យដឹងថា យុវជនម្នាក់ ត្រូវបានឪពុករបស់ជនរងគ្រោះខាងស្រីអាយុ១២ឆ្នាំ ប្តឹងឲ្យកម្លាំងជំនាញការិយាល័យប្រឆាំងការជួញដូរមនុស្ស កងរាជអាវុធហត្ថខេត្តកំពង់ចាម ធ្វើការចាប់ខ្លួន ក្រោយបានធ្វើសកម្មភាពលួងលោមយកកូនស្រីរបស់គាត់អាយុ ១២ ឆ្នាំ ទៅរួមភេទបានសម្រេច នៅចំណុចសណ្ឋាគារយីហោ ហេង ហេង បន្ទប់លេខ ៣១១ ស្តិតនៅភូមិ ទី៦ សង្កាត់វាលវង់ ក្រុងកំពង់ចាម ខេត្តកំពង់ចាម កាលពីវេលាម៉ោង ៦ល្ងាច ថ្ងៃទី ៩ ខែតុលា ឆ្នាំ ២០២១។
សមត្ថកិច្ចបានឲ្យដឹងថា ជនសង្ស័យដែលឃាត់ខ្លួននេះ មានឈ្មោះ សួង អរុណ ភេទ ប្រុស អាយុ ១៨ ឆ្នាំ រស់នៅក្នុងសង្កាត់ដង្កោ ខណ្ឌដង្កោ រាជធានីភ្នំពេញ បានធ្វើសកម្មភាពលួងលោមយកកូនស្រីរបស់គាត់អាយុ ១២ ឆ្នាំ យកទៅរួមភេទបានសម្រេចកាលពីវេលាម៉ោង ១២ ថ្ងៃទី០៨ ខែតុលា ឆ្នាំ២០២១ ។
សមត្ថកិច្ចបានឲ្យដឹងថា មុននឹងឈានដល់ការឃាត់ខ្លួនជនសង្ស័យខាងលើ បន្ទាប់ពីទទួលបណ្តឹងរួច និងដោយបានការអនុញ្ញាតពី ឯកឧត្តម វង្ស ប៊ុនវិសុទ្ធ ព្រះរាជអាជ្ញាអមសាលាដំបូងខេត្តកំពង់ចាម នៅវេលាម៉ោង៧យប់ ថ្ងៃខែឆ្នាំដដែល កម្លាំងជំនាញមន្ទីរស្រាវជ្រាវ និងបង្រ្កាបបទល្មើស កងរាជអាវុធហត្ថខេត្តកំពង់ចាម សហការជាមួយកម្លាំងមូលដ្ឋានកងរាជអាវុធហត្ថក្រុងកំពង់ចាម សរុបចំនួន ០៦ នាក់ រថយន្ត ០១ គ្រឿងម៉ូតូ ០១ គ្រឿង ដឹកនាំដោយលោក វរសេនីយ៍ទោ សែម ឃាង ប្រធានមន្ទីរស្រាវជ្រាវ និងបង្រ្កាបបទល្មើស បានធ្វើការឃាត់ខ្លួនបានជនសង្ស័យ ឈ្មោះ សួង អរុណ នៅចំណុចសណ្ឋាគារយីហោ ហេងហេង នោះតែម្តង បញ្ជូនមកបញ្ជាការដ្ឋានកងរាជអាវុធហត្ថខេត្តកំពង់ចាម ដើម្បីចាត់តាមនិតិវិធី ៕
