រាជធានីភ្នំពេញ ៖ រថយន្ដស៊េរីទំនើបមួយគ្រឿង បើកបរដោយនារីជនជាតិបរទេស២នាក់ បានរេចង្កូតទៅបុករបាំងថ្មចែកទ្រូងផ្លូវ ពេញទំហឹង បណ្តាលឲ្យរថយន្ត រងការខូចខាតយ៉ាងដំណំ កាលពីវេលាម៉ោង១យប់ ឈានចូលថ្ងៃទី១២ ខែតុលា ឆ្នាំ២០២១នេះ នៅចំណុចផ្លូវកម្ពុជាក្រោម ក្នុងសង្កាត់ទឹកល្អក់១ ខណ្ឌទួលគោក រាជធានីភ្នំពេញ ។

ប្រភពព័ត៌មានពីសមត្ថកិច្ចបានឲ្យដឹងថា មុនពេលកើតហេតុ គេបានឃើញ នារីជនជាតិបរទេស២នាក់ បើករថយន្ត Mercedes AMG ស៊េរីទំនើប១គ្រឿង ពាក់ស្លាកលេខ ភ្នំពេញ 2BL-2682 បានបុករបាំងថ្មចែកទ្រូងផ្លូវ បណ្តាលឲ្យរងការខូចខាតអស់១កង់។ ចំណែករថយន្តវិញ រងការខូតខាតយ៉ាងដំណំ សំណាងល្អណាស់ គ្មាននរណាម្នាក់ រងរបួសអ្វីឡើយ ។

ក្រោយកើតហេតុ សមត្ថកិច្ចជំនាញ បានចុះមកធ្វើការវាស់វែង យករថយន្តបង្កទៅរក្សាទុកនៅការិយាល័យចរាចរណ៍ផ្លូវគោក នៃស្នងការដ្ឋាននគរបាលរាជធានីភ្នំពេញ រង់ចាំម្ចាស់ចូលខ្លួនមកធ្វើការដោះស្រាយគ្នាតាមផ្លូវច្បាប់បន្តទៀត៕ Mrr Ka