រាជធានីភ្នំពេញ​​ ៖ បុរសម្នាក់ បើកបររថយន្តម៉ាក 4Ranner សង្ស័យក្នុងល្បឿនលឿន បួងចង្កូតគេចសត្វគោ ដើរឆ្លងផ្លូវ ក៏ជ្រុលទៅបុករថយន្តមួយគ្រឿងទៀត នៅខាងមុខ បណ្ដាលឲ្យរងការខូចខាត ហើយរថយន្តនោះមិនទាន់អស់ល្បឿន ក៏ជ្រុលឡើងឃឿនសួនច្បារចែកទ្រូងផ្លូវ បុកបង្គោលភ្លើងមួយដើមទៀត បណ្ដាលឲ្យរថយន្តរងការខូចខាតយ៉ាងដំណំ សំណាងមិនបង្កឲ្យមានអ្នករបួស កាលពីវេលាម៉ោង៨ ព្រឹកថ្ងៃទី១៤ ខែតុលា ឆ្នាំ២០២១ ស្ថិតនៅតាមបណ្ដោយផ្លូវ៥០ម៉ែត្រ ភូមិព្រែកថ្លឹង សង្កាត់ជើងឯក ខណ្ឌដង្កោ រាជធានីភ្នំពេញ ។

សមត្ថកិច្ចបានបញ្ជាក់ប្រាប់ក្រុមការងារ TVFB ឲ្យដឹងថា មុនពេលកើតហេតុ ប្រជាពលរដ្ឋបានឃើញរថយន្តមួយគ្រឿងម៉ាក 4Ranner ពណ៌ស ពាក់ស្លាកលេខ ភ្នំពេញ 2G-6218 បើកបរដោយបុរសម្នាក់ ក្នុងល្បឿនលឿន ធ្វើដំណើរតាមបណ្ដោយផ្លូវ៥០ម៉ែត្រ ពីលិចទៅកើត ខណៈមកដល់ចំណុចកើតហេតុ បានបួងចង្កូតគេចពីសត្វគោដែលឆ្លងផ្លូវ ក៏ជ្រុលទៅបុករថយន្តនៅពីមុខមួយគ្រឿងទៀតម៉ាក Toyota Rush ពណ៌ស ពាក់ស្លាកលេខ ភ្នំពេញ 2BN-4282ដែលកំពុងបើកបរស្របគ្នា បណ្តាលឲ្យរងការខូចខាត បែកចង្កៀងក្រោយខាងឆ្វេង បន្ទាប់មក រថយន្ត4Ranner នោះមិនទាន់អស់ល្បឿន ក៏ជ្រុលទៅឡើងសួនច្បារចែកទ្រូងផ្លូវ បុកបង្គោលភ្លើង កល់ជាប់ទៅមុខលែងរួច តែម្តង ។ ចំណែករថយន្តវិញ ខូចខាតយ៉ាងដំណំ តែមិនបង្កអោយមានអ្នករងរបួសនោះទេ។

ក្រោយកើតហេតុ កម្លាំងសមត្ថកិច្ចមូលដ្ឋានបានចុះមកដល់ធ្វើការវាស់វែង និងស្ទូចយករថយន្តដាក់អែបខាង ទុកពេលឲ្យគូភាគីទាំងសងខាង ធ្វើការសម្របសម្រួលគ្នាមួយជំហ៊ានសិន បើមិនត្រូវគ្នាសមត្ថកិច្ចវាស់វែងយករថយន្តទាំង២គ្រឿងនោះ ទៅរក្សាទុកនៅជំនាញចរាចរណ៍ខណ្ឌដង្កោ រង់ចាំដោះស្រាយគ្នាពេលក្រោយបន្តទៀត៕ មេសា