ខេត្តកំពង់ស្ពឺ ៖ យោងតាមផេក អគ្គស្នងការដ្ឋាននគរបាលជាតិ បានឲ្យដឹងថា មានករណីគ្រោះថ្នាក់ចរាចរណ៍មួយបានកើតឡើង ដោយរថយន្តម៉ាកហាយឡែនឌ័រ មួយគ្រឿង បានបុកឃឿនពុះចែកទ្រូងផ្លូវលើផ្លូវជាតិលេខ៤ បណ្តាលឲ្យរងការខូចខាត និងបណ្តាលឲ្យមនុស្សចំនួន៤នាក់ របួសធ្ងន់ស្រាល កាលពីវេលាម៉ោង ៥ និង៣០នាទី ព្រឹកថ្ងែទី១៤ ខែតុលា ឆ្នាំ២០២១ នៅចន្លោះគីឡូម៉ែត្រលេខ៤៤-៤៥ ភូមិអង្គសេរី សង្កាត់រការធំ ក្រុងច្បារមន ខេត្តកំពង់ស្ពឺ ។

សមត្ថកិច្ចបានឲ្យដឹងថា រថយន្តម៉ាកហាយឡែនឌ័រ ពណ៌ខ្មៅ ពាក់ស្លាកលេខ ភ្នំពេញ 2AK 4830 បើកពីទិសខាងកើតទៅទិសខាងលិច លុះបើកមកដល់ចំណុចខាងលើ បានបើកបុកឃឿនពុះចែកទ្រូងផ្លូវ ដែលអ្នកបើកបរឈ្មោះ សុខ ប៊ិក ភេទប្រុស អាយុ៤២ឆ្នាំ រស់នៅភូមិថ្នល់ សង្កាត់ស្រង៉ែ ក្រុងសៀមរាប ខេត្តសៀមរាប (របួសស្រាល) និងមានអ្នករួមដំណើរជាមួយចំនួន ០៣នាក់ទៀត ជាជនជាតិចិន មិនស្គាល់អត្តសញ្ញាណ (ត្រូវបានបញ្ជូនទៅព្យាបាលនៅមន្ទីរពេទ្យភ្នំពេញ) ។

សមត្ថកិច្ចបានបន្តឲ្យដឹងទៀតថា ករណីនេះបណ្តាលអោយរថយន្តខាងលើ ខូចខាតយ៉ាងដំណំ និងខូចខាតឃឿនពុះចែកទ្រូងផ្លូវចំនួន ០៣ម៉ែត្រ, ស្លាកសញ្ញាចរាចរណ៍ចំនួន ០១, ប៉ាណូផ្សាយពាណិជ្ជកម្មចំនួន ០១ផ្ទាំង របួសធ្ងន់មនុស្សស្រីម្នាក់ និង៣នាក់ទៀតរបួសស្រាល។

បច្ចុប្បន្ន ចំពោះវត្ថុតាងរថយន្តត្រូវបានសមត្ថកិច្ចយកមករក្សាទុកនៅស្នាក់ការសណ្តាប់ធ្នាប់ចរចរក្រុង ដើម្បីដោះស្រាយតាមនីតិវិធីច្បាប់ ៕