រាជធាណីភ្នំពេញ ៖ ជនសង្ស័យម្នាក់ ត្រូវបានសមត្ថកិច្ចនគរបាលខណ្ឌដង្កោ ធ្វើការស្រាវជ្រាវចាប់ឃាត់ខ្លួនបាន ក្រោយនាំបក្ខពួកផ្សេងទៀត ប្រដាប់ដោយកាំភ្លើង ភ្ជង់ប្លន់លុយ និង ទ្រព្យសម្បត្តិ ពីស្ត្រីអ្នកម៉ាស្សាម្នាក់ បានសម្រេចហើយព្យាយាមរត់គេចខ្លួន កាលពីវេលាម៉ោង២រសៀល ថ្ងៃទី២៩ ខែកញ្ញា ឆ្នាំ២០២១ ត្រង់ចំណុចហាងកោសជប់ម៉ាស្សាយីហោ ៣៣៣ ផ្លូវ៣៧១ ក្នុងភូមិម័ល សង្កាត់ដង្កោ ខណ្ឌដង្កោ រាជធានីភ្នំពេញ។

សមត្ថកិច្ចបានប្រាប់ក្រុមការងារTVFB ឲ្យដឹងថា ជនរងគ្រោះមានឈ្មាះ ដឿន សុភឿន ភេទស្រី អាយុ៣៤ឆ្នាំ មុខរបរម៉ាស្សាកោសជប់ មានទីលំនៅផ្ទះគ្មានលេខ ផ្លូវ៣៧១ ស្ថិតនៅភូមិម័ល សង្កាត់ដង្កោ ខណ្ឌដង្កោ រាជធានីភ្នំពេញ បានបាត់បង់លុយចំនួន៧៥០ដុល្លារអាមេរិក , ខ្សែដៃផ្លាកទីនទម្ងន់៣ជី ចំនួន០១ខ្សែ និងទូរសព្ទ័ដៃចំនួន០២គ្រឿង(ម៉ាកOPPO ១គ្រឿង ម៉ាក VIVO០១គ្រឿង) ។

ចំណែកជនសង្ស័យមានឈ្មោះ គុយ សុធាវុធ ភេទប្រុស អាយុ៣៦ឆ្នាំ មុខរបរមិនពិតប្រាកដ ស្នាក់នៅភូមិព្រែកតាគង់១ សង្កាត់ចាក់អង្រែលើ ខណ្ឌមានជ័យ រាជធានីភ្នំពេញ (មានសារធាតុញៀន) ដកហូតបានកាំភ្លើងខ្លីប្រើហ្គាស(គ្មានបង់)ចំនួន០១ដើម និងមួកក្រណាត់ម៉ាក GUCCI (របស់ជនសង្ស័យពាក់ធ្វើសកម្មភាព) ចំនួន០១ ។

សូមបញ្ជាក់ថា កាលពីថ្ងៃទី២៩ ខែកញ្ញា ឆ្នាំ២០២១ វេលាម៉ោង២រសៀល ជនរងគ្រោះកំពុងអង្គុយនៅក្នុងហាងម៉ាស្សាកោសជប់យីហោ៣៣៣ ផ្លូវ៣៧១ ស្រាប់តែមានជនសង្ស័យចំនួន០៣នាក់ ទី០១/ឈ្មោះ គុយ សុធាវុធ ភេទប្រុស អាយុ៣៦ឆ្នាំ ,ទី០២/ឈ្មោះ ថង ភេទប្រុស អាយុ ២៥ឆ្នាំ ,ទី០៣/ឈ្មោះ ឌុន ភេទប្រុស អាយុ២៦ឆ្នាំ បានជួលកង់បីឥណ្ឌាជិះមកដល់ហាងម៉ាស្សាកោសជប់ខាងលើ ក៏បានចូលក្នុងហាងនាំជនរងគ្រោះចូលក្នុងបន្ទប់ ដើម្បីកោសជប់ តែពេលចូលដល់ក្នុងបន្ទប់ជនសង្ស័យឈ្មោះ គុយ សុធាវុធ បានធ្វើសកម្មភាពយកកាំភ្លើងខ្លីប្រើហ្គាស់ ភ្ជង់ប្លន់យកលុយ និងទ្រព្យសម្បត្តិ ពីជនរងគ្រោះចំនួន៧៥០ដុល្លារអាមេរិក, ខ្សែដៃផ្លាកទីនទម្ងន់៣ជីចំនួន០១ខ្សែ, ទូរស័ព្ទដៃចំនួន០២គ្រឿង ហើយជនសង្ស័យក៏បានគេចខ្លួនបាត់អស់។ បន្ទាប់មកជនរងគ្រោះក៏បានមករាយការណ៍ប្រាប់សម្ថកិច្ច និងដាក់ពាក្យបណ្តឹងនៅប៉ុស្តិ៍នគរបាលរដ្ឋបាលដង្កោ ដើម្បីឲ្យសមត្ថកិច្ចស្រាវជ្រាវរកជនសង្ស័យខាងលើ យកមកធ្វើការសាកសួរ ហើយសមត្ថកិច្ចបានចុះទៅដល់កន្លែងកើតហេតុ ពិនិត្យមើលកាមេរ៉ាសុវត្ថិភាព ដែលបំពាក់នៅហាងម៉ាស្សាកោសជប់យីហោ ៣៣៣ កំណត់បានអត្តសញ្ញាណក្រុមជនសង្ស័យដែលធ្វើសកម្មភាពខាងលើ ។ លុះដល់ថ្ងៃទី១៤ ខែតុលា ឆ្នាំ២០២១ វេលាម៉ោង៥និង៣០នាទីល្ងាច កម្លាំងផ្នែកនគរបាលយុត្តិធម៌សហការជាមួយកម្លាំងសមត្ថកិច្ចប៉ុស្តិ៍នគរបាលរដ្ឋបាលដង្កោ បានធ្វើការស្រាវជ្រាវឃាត់ខ្លួនជនសង្ស័យម្នាក់ឈ្មោះ គុយ សុធាវុធ រួមទាំងវត្ថុតាង កាំភ្លើងខ្លីប្រើហ្គាស(គ្មានបង់)ចំនួន០១ដើម និងមួកក្រណាត់ម៉ាក GUCCI របស់ជនសង្ស័យពាក់ធ្វើសកម្មភាព ចំនួន០១ នៅត្រង់ចំណុចផ្លូវ៣៧១ ស្ថិតនៅភូមិព្រែកតាគង់១ សង្កាត់ចាក់អង្រែលើ ខណ្ឌមានជ័យ រាជធានីភ្នំពេញ យកមកធ្វើការសាកសួរនៅប៉ុស្តិ៍នគរបាលរដ្ឋបាលដង្កោតាមនីតិវិធីច្បាប់តែម្តង ៕ មេសា