រាជធានីភ្នំពេញ ៖ ជនសង្ស័យប្រុសស្រីចំនួន៥នាក់ ត្រូវបានកម្លាំងនគរបាលខណ្ឌចំការមន សហការជាមួយនគរបាលប៉ុស្តិ៍ផ្សារដើមថ្កូវ ធ្វើការចាប់ឃាត់ខ្លួន ខណៈសមត្ថកិច្ចបុកចូលបង្ក្រាបដល់បន្ទប់ជួល ចំនួន៣បន្ទប់ រកឃើញគ្រឿងញៀន ៣៨ កញ្ចប់ ក្នុងនោះមាន៧កញ្ចប់ធំល្មម និងឧបករណ៍សម្រាប់ជក់ប្រើប្រាស់គ្រឿងញៀនមួយចំនួនទៀត កាលពីរសៀលថ្ងៃទី១៥ ខែតុលា ឆ្នាំ២០២១ នៅចំណុចបន្ទប់ជួល តាមផ្លូវបេតុង ភូមិ៥ សង្កាត់ផ្សារដើមថ្កូវ ខណ្ឌចំការមន រាជធានីភ្នំពេញ ។

សមត្ថកិច្ចបានឲ្យដឹងថា ជនសង្ស័យទី១ ឈ្មោះ យ៉ាន់ ចន ភេទ ស្រី អាយុ៤២ឆ្នាំ , ទី២ឈ្មោះ សន វាសនា ភេទប្រុស អាយុ២១ឆ្នាំ , ទី៣ឈ្មោះ ម៉ក់ សីហា ភេទប្រុស អាយុ ២៦ឆ្នាំ , ទី៤ឈ្មោះ វិត មករា ភេទប្រុស អាយុ ៣៣ឆ្នាំ និងទី៥មានឈ្មោះ ជា សុផានី ភេទ ស្រី អាយុ ៣៣ឆ្នាំ។

សមត្ថកិច្ចបានបន្តឲ្យដឹងទៀតថា ដំបូងឡើយ សមត្ថកិច្ចបានចូលបង្ក្រាបបន្ទប់លេខ ០១ រកឃើញគ្រឿងញៀនចំនួន ៦កញ្ចប់ ក្នុងនោះមានតូច១កញ្ចប់ និង៥កញ្ចប់ទៀតធំល្មម ជញ្ជីងថ្លឹង១ ឃាត់ខ្លួនបានជនសង្ស័យប្រុសស្រី៣នាក់ ។

ចំណែក បន្ទប់លេខ ០៧ សមត្ថកិច្ចបានចូលបង្ក្រាប រកឃើញថ្នាំញៀនចំនួន៨ កញ្ចប់ ក្នុងនោះមាន៦កញ្ចប់តូចៗ និង២កញ្ចប់ទៀតធំល្មម ឃាត់ខ្លួនមនុស្ស២នាក់ ។

ដោយឡែកបន្ទប់លេខ០៤ សមត្ថកិច្ចបានចូលបង្ក្រាប ជនសង្ស័យបានទម្លុះដំបូលផ្ទះរត់គេចខ្លួន សល់តែថ្នាំញៀន២៤កញ្ចប់តូច នៅក្នុងបន្ទប់ ។

បច្ចុប្បន្នជនសង្ស័យរួមទាំងវត្ថុតាង ត្រូវបានសមត្ថកិច្ចកសាងសំណុំរឿងបញ្ជូនខ្លួនទៅកាន់ អធិការដ្ឋាននគរបាលខណ្ឌចំការមន ដើម្បីចាត់ការតាមនីតិវិធីច្បាប់បន្តទៀត ៕