ខេត្តកំពង់ស្ពឺ ៖ ករណីគ្រោះថ្នាក់ចរាចរណ៍មួយបានកើតឡើង ដោយរថយន្តម៉ាកDAEWOO បានជ្រុលទៅបុកផ្នែកខាងក្រោយរថយន្តមួយគ្រឿង ម៉ាក HYUNDAI បណ្តាលឲ្យមនុស្ស៤នាក់ របួសធ្ងន់ស្រាល កាលពីយប់ថ្ងៃទី១៦ ខែតុលា ឆ្នាំ២០២១នៅលើផ្លូវជាតិលេខ៤ ចន្លោះគីឡូម៉ែត្រលេខ ៩៩-១០០ ភូមិទី៦ ឃុំយាយម៉ៅពេជ្រនិល (អតីតឃុំត្រែងត្រយឹង) ស្រុកភ្នំស្រួច ខេត្តកំពង់ស្ពឺ ។ នេះបើយោងតាមផេកស្នងការដ្ឋាននគរបាលខេត្តកំពង់ស្ពឺ។

សមត្ថកិច្ចបានឲ្យដឹងថា ករណីនេះ កើតឡើងរវាង រថយន្តមួយគ្រឿងម៉ាកDAEWOO ពណ៌ទឹកប្រាក់ ខៀវលាយ ស ស្លាកលេខ ភ្នំពេញ 3E-6189 សណ្តោងសឺមីរ៉ឺម៉ក ស្លាកលេខ ភ្នំពេញ 4A-9019 បើកបរពីទិស ដៅពីរលិចទៅកើត មកដល់ចំណុចកើតហេតុខាង លើបានជ្រុលទៅបុកផ្នែកខាងក្រោយរថយន្តមួយគ្រឿង ម៉ាក HYUNDAI ពណ៌ស ស្លាកលេខភ្នំពេញ 3A-9312 បើកបរដោយឈ្មោះ សែត ចំរើន អាយុ៣៧ឆ្នាំ នៅភូមិទី១ ឃុំត្រែងត្រយឹង ស្រុកភ្នំស្រួច ខេត្តកំពង់ស្ពឺ នឹងអ្នករួមដំណើរឈ្មោះ អឿន សាន អាយុ ២៨ឆ្នាំ នៅភូមិត្រពាំងឆ្កួន ឃុំព្រៃក្រសាំង ស្រុកឧដ្តុង ខេត្តកំពង់ស្ពឺ។

តាមការសន្និដ្ឋាន ជំហ៊ានបឋម សមត្ថកិច្ចចុះដល់ទីតាំងកើតហេតុ ពិនិត្យឃើញថា អាចបណ្ដាលមកពី ការបើកវ៉ាជែង និងបាត់ម្ចាស់ការបន្ថែម និងការងងុយគេងធ្វើឱ្យអ្នកបញ្ជារថយន្ដមិនអាចគ្រប់គ្រងស្ថានការណ៍បាន និងតូបអ្នកលក់ដូរនៅចិញ្ចើមផ្លូវ មានអ្នករងរបួសមនុស្សចំនួន០៤នាក់ ធ្ងន់ ស្រាល និងខូចសម្ភារៈ មួយចំនួនទៀត។

បច្ចុប្បន្ន អ្នករបួសខាងលើត្រូវបានសមត្ថកិច្ចបញ្ជូនទៅ សង្រ្គោះ ព្យាបាល នៅមន្ទីរពេទ្យខេត្តកំពង់ស្ពឺ ។ រីឯអ្នកបើកបររថយន្ដ បង្កបានគេចខ្លួនមុនពេលសមត្ថកិច្ចចុះទៅដល់កន្លែងកើតហេតុ ខណៈរថយន្តក៏ត្រូវបានសមត្ថកិច្ចស្ទួចយកទៅរក្សាទុកនៅអធិការដ្ឋាននគរបាលស្រុក ភ្នំស្រួច ដើម្បីកសាងសំណុំរឿង ចាត់ការតាមច្បាប់បន្តទៀត៕