រាជធានីភ្នំពេញ​​ ៖ រថយន្តCamry មួយគ្រឿង បានរេចង្កូតទៅបុករបងផ្ទះបងប្អូនប្រជាពលរដ្ឋ បណ្ដាលម៉ាស៊ីនរថយន្ដ ហោះចេញមកក្រៅ រងការខូចខាតទាំងស្រុង កាលពីវេលាម៉ោង ២យប់ ថ្ងៃទី១៧ ខែតុលា ឆ្នាំ២០២១ តាមបណ្ដោយផ្លូវណតប្រីជ សង្កាត់អូបែកក្អម ខណ្ឌសែនសុខ រាជធានី ភ្នំពេញ។

ប្រភពព័ត៌មានពីសមត្ថកិច្ចមូលដ្ឋាន បានឲ្យដឹងថា មុនពេលកើតហេតុ គេបានឃើញបុរសម្នាក់ បើកបររថយន្ដម៉ាកកាមរីមួយគ្រឿង ដែលពាក់ស្លាកលេខ ភ្នំពេញ 2AC-3168 ធ្វើដំណើរតាមបណ្ដោយផ្លូវណតប្រីជ ក្នុងទិសដៅពីជើងមកត្បូង មកចំណុចកើតហេតុ រថយន្ដក៏បានរេចង្កូតទៅបុកចូលរបងផ្ទះប្រជាពលរដ្ឋ បណ្តាលឲ្យរថយន្តរងការខូចខាតយ៉ាងដំណំ។ ចំណែកឯម៉ាស៊ីនរថយន្ដវិញ បានខ្ទាតចេញពីរថយន្ដ ចម្ងាយប្រហែលជា១០០ ម៉ែត្រ សំណាងគ្មានអ្នកណារងរបួសឡើយ។

ក្រោយពេលកើតហេតុ សមត្ថកិច្ចជំនាញចរាចរណ៍ នៃអធិការនគរបាលខណ្ឌសែនសុខ បានធ្វើការស្ទូចរថយន្តយកទៅរក្សាទុកនៅអធិការដ្ឋាននគរបាលខណ្ឌសែនសុខ ដើម្បីរង់ចាំម្ចាស់ចូលមកដោះស្រាយគ្នាទៅតាមផ្លូវច្បាប់ ៕ Mrr Ka