រាជធានីភ្នំពេញ ៖ ខណៈមេឃ កំពុងធ្លាក់ភ្លៀងខ្លាំង បុរសម្នាក់បើករថយន្តMazdaមួយគ្រឿង បានរេចង្កូតបុករបាំងថ្មពុះចែកទ្រូងផ្លូវ បណ្ដាលរថយន្ដខ្ទេចមួយកំណាត់ខាងមុខ យ៉ាងដំណំកាលពីវេលាម៉ោង ១០ យប់ ថ្ងៃទី១៦ ខែតុលា ឆ្នាំ២០២១ នៅចំណុចផ្លូវព្រះសីហនុ ក្នុងសង្កាត់ បឹងកេងកង់ទី១ ខណ្ឌបឹងកេងកង រាជធានីភ្នំពេញ ។

ប្រភពព័ត៌មាន បានឲ្យដឹងថា មុនពេលកើតហេតុ គេបានឃើញ រថយន្តMazda មួយគ្រឿង ពណ៌ក្រហម ដែលពាក់ស្លាកលេខ ភ្នំពេញ 2 AH-5588 បើកបរសង្ស័យក្នុងល្បឿនលឿន ខណៈមេឃកំពុងធ្លាក់ភ្លៀងខ្លាំងផងនោះ បានរេចង្កូតបុករបាំងថ្មពុះចែកទ្រូងផ្លូវ បណ្ដាលឲ្យរថយន្ដខ្ទេចមួយកំណាត់មុខ រងការខូចខាតយ៉ាងដំណំ តែសំណាងគ្មានអ្នកណារងរបួសឡើយ ។

ភ្លាមៗសមត្ថកិច្ចមូលដ្ឋានក៏បានមកដល់ និងបានទាក់ទងទៅសមត្ថកិច្ចជំនាញចរាចរណ៍របស់ស្នងការនគរបាលរាជធានីភ្នំពេញ ចុះមកធ្វើការវាស់វែង និងស្ទូចរថយន្តយកទៅរក្សាទុក នៅស្នងការនគរបាលរាជធានីភ្នំពេញ រង់ចាំម្ចាស់ចូលមកដោះស្រាយទៅតាមផ្លូវច្បាប់បន្តទៀត៕ Mrr Ka