រាជធានីភ្នំពេញ​ ៖ បុរសម្នាក់បើករថយន្តកូរ៉ូឡា មួយគ្រឿង សង្ស័យខ្វះការប្រុងប្រយត្ន័ បានរេចង្កូតបុករបាំងថ្មចែកទ្រូងផ្លូវ បណ្ដាលឲ្យដាច់កង់មុខ រងការខូចខាតយ៉ាងដំណំ កាលពីវេលាម៉ោង ១០យប់ ថ្ងៃទី១៦ ខែតុលា ឆ្នាំ២០២១ នៅតាមបណ្តោយផ្លូវសហព័ន្ធរុស្សី ក្នុងសង្កាត់ស្រះចក ខណ្ឌដូនពេញ រាជធានីភ្នំពេញ។

ប្រភពព័ត៌មាននៅកន្លែងកើតហេតុ បានឲ្យដឹងថា មុនពេលកើតហេតុ គេបានឃើញរថយន្តកូរ៉ូឡា មួយគ្រឿង ដែលពាក់ស្លាកលេខ ភ្នំពេញ 2 V-6451 សង្ស័យបើកបរក្នុងល្បឿនលឿន ខណៈកំពុងមានភ្លៀងយ៉ាងខ្លាំង បណ្តាលឲ្យចង្កូត មកបុករបាំងថ្មពុះចែកទ្រូងផ្លូវ បណ្ដាលឲ្យរថយន្ដរងការខូចខាតយ៉ាងដំណំ។ ចំណែកឯអ្នកបើករថយន្តវិញពុំមានរបួសអ្វីឡើយ។

ក្រោយពេលកើតហេតុ សមត្ថកិច្ចមូលដ្ឋានបានទាក់ទងសមត្ថកិច្ចជំនាញចរាចរណ៍របស់ស្នងការដ្ឋាននគរបាលរាជធានីភ្នំពេញ ធ្វើការវាស់វែង និងស្ទូចរថយន្តយកទៅរក្សាទុកនៅស្នងការដ្ឋាននគរបាលរាជធានីភ្នំពេញ រង់ចាំម្ចាស់ចូលមកដោះស្រាយទៅតាមផ្លូវច្បាប់ ៕ Mrr Ka