រាជធានីភ្នំពេញ ៖ ជនសង្ស័យម្នាក់ ធ្វើសកម្មភាពលួចម៉ូតូសណ្ដោងរឺម៉ក បានសម្រេច ជិះរត់មិនរួច ត្រូវបានម្ចាស់គេដេញតាមទាន់ ចាប់ខ្លួនបាន ប្រគល់អោយសមត្ថកិច្ច កាលវេលាម៉ោង៣រសៀល ថ្ងៃទី១៧ ខែតុលា ឆ្នាំ២០២១ ត្រង់ចំណុចខាងមុខឃ្លាំងថ្មម៉ាប ផ្លូវ២១៧ នៅភូមិរលួស សង្កាត់ជើងឯក ខណ្ឌដង្កោ រាជធានីភ្នំពេញ ។

សមត្ថកិច្ចនគរបាលខណ្ឌដង្កោ បានប្រាប់ក្រុមការងារ TVFB ឲ្យដឹងថា ជនរងគ្រោះឈ្មោះ អ៊ឹម ខាន់ថង ហៅ ឡយ ភេទប្រុស អាយុ២៤ឆ្នាំ មុខរបរជាងថ្មម៉ាប ស្នាក់នៅផ្ទះជួល ភូមិរលួស សង្កាត់ជើងឯក ខណ្ឌដង្កោ រាជធានីភ្នំពេញ ។ ចំណែក ជនសង្ស័យឈ្មោះ ព្រីវ សាវុធ ភេទប្រុស អាយុ៤១ឆ្នាំ មុខរបរមិនពិតប្រាកដ ស្នាក់នៅផ្ទះជួលភូមិដំណាក់ធំ សង្កាត់ស្ទឹងមានជ័យទី៣ ខណ្ឌមានជ័យ រាជធានីភ្នំពេញ ។

ក្នុងនោះ សមត្ថកិច្ចក៏បានធ្វើការដកហូតបាន ម៉ូតូម៉ាកហុងដាវ៉េវ ពណ៌ខ្មៅ ពាក់ផ្លាកលេខ ភ្នំពេញ 1CX-4641 មានលេខតួ401739 (ម៉ូតូចាស់) សណ្តោងរ៉ឺម៉កពណ៌ខ្មៅ ចំនួន០១គ្រឿង ។

សមត្ថកិច្ចបានបន្តឲ្យដឹងទៀតថា មុនពេលកើតហេតុ ជនរងគ្រោះបានទុកម៉ូតូម៉ាកហុងដាវ៉េវ ពណ៌ខ្មៅ ពាក់ផ្លាកលេខ ភ្នំពេញ 1CX-4641 (ម៉ូតូចាស់) សណ្តោងរ៉ឺម៉កពណ៌ខ្មៅ នៅខាងមុខឃ្លាំងថ្មម៉ាប ផ្លូវ២១៧ ស្ថិតនៅភូមិរលួស សង្កាត់ជើងឯក ខណ្ឌដង្កោ ដោយមិនបានដកកូនសោរចេញពីម៉ូតូទេ ហើយជនរងគ្រោះក៏បានចូលទៅក្នុងឃ្លាំង ដើម្បីធ្វើការដូចសព្វមួយដង ។ ពេលនោះស្រាប់តែលេចមុខជនសង្ស័យឈ្មោះ ព្រីវ សាវុធ ភេទប្រុស អាយុ៤១ឆ្នាំ បានដើរមកដល់ខាងមុខឃ្លាំងថ្មម៉ាប ក៏បានធ្វើសកម្មភាពលួចម៉ូតូ និងរ៉ឺម៉កខាងលើ របស់ជនរងគ្រោះ បើកគេចខ្លួនតាមផ្លូវ២១៧ ពីត្បូងទៅជើង ហើយជនរងគ្រោះបានឃើញក៏ខ្ចីម៉ូតូកម្មករធ្វើការជាមួយគ្នា ជិះដេញតាមពីក្រោយ រួចស្រែកថា ចោរៗ ហើយជនសង្ស័យបានបើកម៉ូតូសណ្ដោងរ៉ឺម៉ក ដល់ចំណុចមុខមន្ទីរពេទ្យបង្អែកដង្កោ ស្ថិតនៅភូមិខ្វា សង្កាត់ដង្កោ ខណ្ឌដង្កោ ក៏ត្រូវបានប្រជាពលរដ្ឋដែលធ្វើដំណើរតាមផ្លូវជួយចាប់ឃាត់ខ្លួនជនសង្ស័យបានប្រគល់អោយ

សមត្ថកិច្ចតែម្តង ។

បច្ចុប្បន្នជនសង្ស័យខាងលើ ត្រូវបានសមត្ថកិច្ចនាំខ្លួនមកធ្វើការសាកសួរ នៅអធិការដ្ឋានគរបាលខណ្ឌដង្កោ ដើម្បីឃាត់ខ្លួនបណ្តោះអាសន្ន និងកសាងសំណុំរឿងបញ្ជូនខ្លួនទៅកាន់ តុលាការចាត់ការតាមច្បាប់បន្តទៀត ៕ មេសា