ខេត្តព្រះសីហនុ ៖ ជនសង្ស័យម្នាក់ ធ្វើសកម្មភាពលួចម៉ូតូប្រជាពលរដ្ឋបាន១យប់ ស្អែកឡើងត្រូវបាន កម្លាំងជំនាញផែននគរបាលព្រហ្មទណ្ឌ សហការជាមួយកម្លាំងនគរបាលនៃអធិការដ្ឋានស្រុកព្រៃនប់ ឃាត់ខ្លួនបាន កាលពីថ្ងៃទី១៧ ខែតុលា ឆ្នាំ២០២១ នៅចំណុច ឃុំអូរឧញ៉ាហេង ស្រុកព្រៃនប់ ខេត្តព្រះសីហនុ ពេលដែលជនសង្ស័យ ជិះម៉ូតូដែលលួចបាន បម្រុងគេចខ្លួន ។ នេះបើយោងតាមផេក ផ្សព្វផ្សាយអប់រំ ស្នងការដ្ឋាននគរបាលខេត្តព្រះសីហនុ ។

សមត្ថកិច្ចបានឲ្យដឹងថា ជនសង្ស័យរូបនេះ មានឈ្មោះ ចែត វុទ្ធី ភេទប្រុស អាយុ ២៣ឆ្នាំ មុខរបរ មិនពិតប្រាកដ មានទីលំនៅ ភូមិឬទ្ធី២ ឃុំកែវផុស ស្រុកស្ទឹងហាវ ខេត្តព្រះសីហនុ បានធ្វើសកម្មភាពលួចម៉ូតូមួយគ្រឿងម៉ាក Zoomer X ពណ៌ស ពាក់ស្លាកលេខ បាត់ដំបង 1S-5056 ពីប្រជាពលរដ្ឋ កាលពីយប់ថ្ងៃទី១៦ ខែតុលា ឆ្នាំ២០២១ នៅចំណុចផែរូយ៉ាល់ ក្រុងព្រះសីហនុ ហើយបានរត់គេចខ្លួន លុះនៅថ្ងៃទី១៧ ខែតុលា សមត្ថកិច្ចក៏ស្រាវជ្រាវចាប់ខ្លួនបានតែម្តង ខណៈកំពុងជិះម៉ូតូដែលលួចពីគេបាននោះ រត់គេចខ្លួន។

បច្ចុប្បន្នជនសង្ស័យខាងលើ ត្រូវបានកម្លាំងជំនាញ បាននាំមកកាន់ស្នងការដ្ឋាននគរបាលខេត្ត កំពុងបន្ដសាកសួរ និងចាត់ការតាមនីតិវិធីច្បាប់បន្តទៀត ៕